15-may – Xalıqaralıq shańaraq kúni múnásibeti menen Berdaq atındaǵı Qaraqalpaq mámleketlik akademiyalıq muzıkalı teatrında saltanatlı bayram ilajı bolıp ótti.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, qatnasıwshılardı bayram menen qutlıqladı, sonday-aq, qala hám rayonlardaǵı úlgili shańaraq iyelerine «Ibratlı shańaraq» kókirek belgilerin tapsırdı.

Áhmiyetlisi, saltanatlı ilajda Niyazovlar shańaraǵı – Ájiniyaz atındaǵı Nókis mámleketlik pedagogikalıq institutı Dene mádeniyatı fakulteti sport pánleri kafedrasınıń baslıǵı, professor Asqar Niyazov hám onıń ómirlik joldası, Qaraqalpaqstan Respublikası Joqarǵı Keńesiniń deputatı Olga Niyazovaǵa «Ibratlı shańaraq» kókirek belgisi tapsırıldı.

Bayram saltanatı kórkem óner sheberleri atqarıwındaǵı koncert baǵdarlaması, sonıń menen birge, «Doslıq» kanalınıń boyında sánege arnalǵan teatrlastırılǵan ruwxıy-aǵartıwshılıq ilajları menen dawam etti.

NMPI baspasóz xızmeti.