Kitapxana – bul bilim hám mánawiyat orayı bolsa, ol jerde jumıs islep atırǵan adamlar xalqımızǵa, keleshek áwladlarımız bolǵan jaslarımızǵa ziya tarqatatuǵın, eń pidayı, jankúyer insanlar bolıp esaplanadı.

Búgin, 21-may – Ózbekstan Respublikasında kitapxanashılar kúni bayramı sıpatında mámleketimiz boylap keń túrde belgilenbekte.

Búgingi bayram múnásibeti menen institutımızdıń málimleme-resurs orayında xızmet etip atırǵan barlıq qánige xızmetkerlerdi shın júrekten qutlıqlayman.

Kitapxana – bul tek ǵana bilim orayı bolıp qalmastan, sonıń menen birge, adamzattıń bay tariyxıy hám mádeniy miyrasın áwladlarǵa jetkeretuǵın muqqaddes dárgay bolıp tabıladı. Usı dárgayda xızmet etip atırǵan siziń miynetińiz sebepli mıńlaǵan jaslar ilimge joldas bolmaqta, aǵartıwshılıq dúnyasına kirip barmaqta. Sizler kitaplardı saqlaw menen birge olardıń ruwxı menen adamlardı ilhamlandırasız.

Sonı ayrıqsha atap ótiwimiz kerek, biziń institutımızdıń málimleme-resurs orayı Qaraqalpaqstan Respublikasındaǵı eń bay kitapxanalardıń biri bolıp tabıladı. Bul jerde 16 mıńnan aslam atamadaǵı 180 mıńǵa shamalas kitaplar bolıp, 14 mıńǵa shamalas kitap oqıwshıları aǵza bolǵan. Dizimge alıw, elektron katalogtan paydalanıw, oqıw hám kompyuter zalları bárqulla studentler hám ilimiy izleniwshilerge tolı boladı. Orayda «Elektron kitapxana» sisteması, sonday-aq, student-jaslarımızdı kitapqumarlıqqa baǵdarlaw maqsetinde «Kitapqumarlar klubı» nátiyjeli jumıs islep turıptı.

Házirgi waqıtta sanlı dáwirdiń imkaniyatlarınan paydalanǵan halda kitapxanamızdı rawajlandırıw, jańa texnologiyalardı engiziw baǵdarında ámelge asırıp atırǵan jumıslarıńız ayrıqsha húrmetke ılayıqlı.

Sizlerdiń pidayılıq penen islep atırǵan miynetlerińizdi joqarı dárejede qádirleymen hám institutımızdıń ilimiy-aǵartıwshılıq jaqtan rawajlanıwına qosıp atırǵan úlesińiz ushın shın júrekten minnetdarshılıq bildiremen.

Sizlerge bekkem densawlıq, joqarı nátiyjeler hám jańa tabıslar tileymen! Bárqulla ilham hám aǵartıwshılıq nurın taratıwday ullı jumıslardı dawam etiwińizge tileklespen!

Húrmet penen,

Quvondiq Qodirov,
Ájiniyaz atındaǵı Nókis mámleketlik pedagogikalıq institutınıń rektorı.