Búgin, 12-iyun kúni Ózbekstan Respublikası Mektepke shekemgi hám mektep bilimlendiriwi ministriniń orınbasarı – Nizamiy atındaǵı Ózbekstan milliy pedagogikalıq universitetiniń rektorı Ezozxon Karimova Ájiniyaz atındaǵı Nókis mámleketlik pedagogikalıq institutına keldi.

Miymanlardı institut rektorı Quvondiq Qodirov, prorektorlar, tiyisli bólim baslıqları kútip aldı.

Ministr orınbasarı dáslep institutta qaraqalpaq ádebiyatınıń kórnekli wákili Ájiniyaz Qosıbay ulınıń 200 jıllıǵı múnásibeti menen Ózbekstan Respublikası Prezidentiniń tiyisli qararı tiykarında shólkemlestirilgen Ájiniyaz muzeyinde boldı. Bul jerdegi eksponatlar menen tanısıp, muzeydiń estelikler kitabına óz tileklerin jazıp qaldırdı.

Bunnan soń Ezozxon Karimova ótken jılı instituttıń 90 jıllıǵı qarsańında paydalanıwǵa tapsırılǵan eki mıń orınǵa mólsherlengen jańa oqıw imaratındaǵı málimleme-resurs orayı, IT-inkubaciya orayı, laboratoriyalardaǵı sharayatlardı kózden ótkerdi. Tiyisli oqıw ádebiyatları menen támiyinlew boyınsha ámelge asırılıp atırǵan jumıslar menen tanıstı, sonday-aq, pitkeriwshi kurs studentleriniń pitkeriw qánigelik jumısların qorǵaw ilajlarına qatnasıp, olarǵa aldaǵı ilimiy-pedagogikalıq jumıslarında tabıslar tiledi.

Ministr orınbasarı institutta jaslardıń bilim alıwı, qábiletlerin júzege shıǵarıwı, ilimiy-izertlew jumısları menen shuǵıllanıwı ushın jaratılǵan sharayatlarǵa joqarı baha berdi.

NMPI baspasóz xızmeti.