Aldın xabar bergenimizdey, búgin, 12-iyun kúni Ózbekstan Respublikası Mektepke shekemgi hám mektep bilimlendiriwi ministriniń orınbasarı – Nizamiy atındaǵı Ózbekstan milliy pedagogikalıq universitetiniń rektorı Ezozxon Karimova Ájiniyaz atındaǵı Nókis mámleketlik pedagogikalıq institutına keldi.

Institutta jaslardıń bilim alıwı hám qábiletlerin júzege shıǵarıwı ushın jaratılǵan sharayatlardı kózden ótkergennen soń ministr orınbasarı instituttıń tiyisli juwapker basshıları menen ushırasıw ótkerdi.

Ushırasıwda Ózbekstan Respublikası Prezidentiniń «Pedagog kadrlar tayarlaw sistemasın bunnan bılay da jetilistiriw ilajları haqqında»ǵı Pármanı hám onnan kelip shıǵıp tarawda ámelge asırılatuǵın jumıslar keń túrde dodalandı.

Atap aytqanda, tarawda izbe-izlik hám úzliksizlikti támiyinlew, ilim, bilimlendiriw hám ámeliyattıń birligin kúsheytiw, sonday-aq, xalıqaralıq tájiriybe tiykarında oqıw baǵdarlamaların modernizaciyalawdıń áhmiyeti tuwralı pikir almasıldı.

Ushırasıw dawamında institutta ilimiy-pedagogikalıq baǵdarda ámelge asırılıp atırǵan jumıslar haqqında maǵlıwmatlar berildi.

Ministr orınbasarı Ezozxon Karimova pedagog kadrlar tayarlaw sistemasın sapalıq jaqtan jańa basqıshqa kóteriw hám tarawǵa investiciyalar jáne grantlardı keńnen tartıw boyınsha juwapkerlerge tiyisli tapsırmalar berdi.

NMPI baspasóz xızmeti.