Aldın xabar bergenimizdey, usı jıldıń 11-13-iyun kúnleri Úrgenish mámleketlik pedagogikalıq institutında Ózbekstan Respublikasındaǵı barlıq joqarı oqıw orınları studentleri arasında «Debat» intellektual turniriniń respublikalıq basqıshı bolıp ótti.

Joqarı bilimlendiriw, ilim hám innovaciyalar ministrligi, Jaslar isleri agentligi hám Ózbekstan jaslar awqamı tárepinen shólkemlestirilgen turnirdiń juwmaqlawshı basqıshında respublikamızdıń hár qıylı aymaqlarınan ulıwma 18 komanda logikalıq pikirlew, sóylew mádeniyatı hám áhmiyetli jámiyetlik mashqalalar boyınsha óz ara debat alıp bardı.

Respublikalıq basqıshta Qaraqalpaqstan Respublikasınan qatnasqan Ájiniyaz atındaǵı Nókis mámleketlik pedagogikalıq institutınıń «Sahra búlbilleri» komandası saylap alıw hám topar basqıshlarında joqarı nátiyjege erisip, sherek final basqıshına shekem jetip bardı.

Komandamız aǵzaları bolǵan Baslawısh tálim fakultetiniń 4-kurs studentleri Durdona Tolıbaeva hám Sevara Yusupova, sonıń menen birge, Tariyx fakultetiniń 2-kurs studenti Jasurbek Nurullayev turnirdiń respublikalıq basqıshında belsene qatnasqanı ushın shólkemlestiriwshiler tárepinen minnetdarshılıq xatları hám estelik sawǵaları menen sıylıqlandı.

Institutımız komandasına metodist Erniyaz Qasımov trenerlik etti.

NMPI baspasóz xızmeti.