Búgin, 14-iyun kúni Qaraqalpaqstan Respublikası Ministrler Keńesiniń Baslıǵı Farxod Ermanov Ájiniyaz atındaǵı Nókis mámleketlik pedagogikalıq institutınıń pitkeriwshi kurs studentleri menen ushırasıw ótkerdi.

Ilajǵa institut rektorı Quvondiq Qodirov, prorektorlar, fakultet dekanları, tiyisli ministrlikler, basqarmalar, mákeme, kárxana hám shólkemlerdiń basshıları jáne juwapker xızmetkerleri qatnastı.

Ashıq sáwbetlesiw tárizinde ótken ushırasıwda Farxod Ermanov elimizde Prezidentimiz basshılıǵında keleshek iyeleri esaplanǵan jaslardıń bilim alıwı, kásip-óner úyreniwi, óz qábiletlerin júzege shıǵarıwı, isbilermenlik penen shuǵıllanıwı ushın jaratılıp atırǵan sharayatlar, tarawda ámelge asırılıp atırǵan keń kólemli reformalar haqqında maǵlıwmatlar berdi.

Atap aytqanda, mámleketimiz basshısınıń 2025-jıl 14-fevraldaǵı «Joqarı bilimlendiriw shólkemleri pitkeriwshileriniń jumısqa ornalasıwına kómeklesiw boyınsha qosımsha ilajlar haqqında»ǵı qararı tiykarında jaslardıń bántligin támiyinlew, joqarı oqıw orınları pitkeriwshileriniń miynet bazarına integraciyasın kúsheytiw, jeke menshik sektor hám kommerciyalıq bankler menen birgelikte kadrlar tayarlaw procesin jetilistiriw baǵdarında nátiyjeli jumıslar jolǵa qoyılmaqta.

«Keleshekke qádem» baǵdarlaması sheńberinde óz biznes ideyaların ámelge asırıw niyeti bolǵan pitkeriwshi kurs studentleri ushın biznes ideyanı tayar joybarǵa shekem jetkeriw procesinde tolıq birge islesiw hám qolaylı shártlerde qarjılandırıw maqsetinde «Ózmilliy bank» jáne «Asabank» tárepinen ámelge asırılıp atırǵan jumıslar keń túrde dodalandı.

Ushırasıwda pitkeriwshi kurs studentleri óz biznes hám startap ideyaların ámeliyatqa engiziw ushın qolaylı shártlerde kredit qarjıların alıw, isbilermenligin jolǵa qoyıw, jumısqa ornalasıw hám bántlikti támiyinlew máseleleri boyınsha pikir-usınısların bildirip, óz sorawlarına juwapkerlerden tolıq juwaplar aldı.

NMPI baspasóz xızmeti.