«Áhmiyetli 90 kún» ilajları sheńberinde Ájiniyaz atındaǵı Nókis mámleketlik pedagogikalıq institutı Fizika-matematika fakultetinde studentler hám máhálle jaslarınıń qatnasıwında ámeliy baǵdardaǵı bir qatar dógerekler hám oqıw-laboratoriya sabaqları ótkerilmekte.

Atap aytqanda, fizikanı oqıtıw metodikası kafedrası baslaması menen shólkemlestirilgen «Erkin elektromagnit terbelisler» temasındaǵı laboratoriyalıq sabaqlarda qatnasıwshılar elektromagnit maydanları hám terbelis processleriniń ámeliy kórinisi menen jaqınnan tanıstı.

Institut janındaǵı IT-inkubaciya orayında «Programmalastırıw tilleri hám jasalma intellekt» baǵdarında shólkemlestirilgen sabaqlarda studentler hám jaslar Python hám C++ sıyaqlı programmalastırıw tillerinde programma dúziw, jasalma intellekttiń tiykarǵı principleri hám qollanılıwı boyınsha teoriyalıq hám ámeliy bilimlerge iye boldı.

Sonday-aq, texnologiyalıq tálim kafedrası janındaǵı oqıw-ámeliyat ustaxanasında «Robototexnika hám 3D modellestiriw» dógeregi sheńberinde jaslarǵa zamanagóy robototexnika sistemaları, sensorlı basqarıw, Arduino platforması hám 3D model jaratıw baǵdarında bilim hám kónlikpeler berildi.

Bul sabaqlar jaslardıń ilim hám texnologiyaǵa qızıǵıwshılıǵın arttırıw, olardı ámeliyatqa jaqınlastırıw, intellektuallıq hám innovaciyalıq potencialın rawajlandırıwǵa xızmet etpekte.