Joqarı bilimlendiriw, ilim hám innovaciyalar ministriniń tiyisli buyrıǵı menen joqarı oqıw orınları hám akademiyalıq liceylerde jańa 2025-2026-oqıw jılın baslaw sáneleri tastıyıqlandı.

Oǵan bola:

– akademiyalıq liceylerdiń barlıq basqısh oqıwshıları hám joqarı oqıw orınlarınıń 1-basqısh studentleri ushın oqıw procesi 2025-jıl 3-sentyabrden;

– joqarı oqıw orınlarınıń 2- hám onnan joqarı basqısh studentleri ushın 8-sentyabrden baslanadı.

Joqarı oqıw orınlarında birinshi basqıshqa qabıl etilgen studentler ushın «Kredit bilimlendiriwi sistemasına kirisiw» hápteligi hám «Studentlikke baǵıshlaw» ilajları shólkemlestiriledi.

Háptelik sheńberinde:

– studentlerdi joqarı oqıw orınlarınıń jumısları menen tanıstırıw, kredit-modul sistemasınıń mazmunı, áhmiyeti hám abzallıqların túsindiriw jáne tańlaw pánlerin maqsetli tańlaw;

– studentlerde ózbetinshe bilim alıw kónlikpelerin qáliplestiriw, akademiyalıq hadallıq principleri hám kásiplik jáne jeke rawajlanıw máseleleri boyınsha úgit-násiyat jumısları ámelge asırıladı.

NMPI baspasóz xızmeti.