Búgin, 4-sentyabr kúni Ájiniyaz atındaǵı Nókis mámleketlik pedagogikalıq institutında 2025-2026-oqıw jılınıń ashılıwına arnalǵan saltanatlı ilaj bolıp ótti.

Ilajǵa Qaraqalpaqstan Respublikası Mektepke shekemgi hám mektep bilimlendiriwi ministrligi wákilleri, nuranıy ustazlar, institut jámááti, bıyılǵı oqıw jılında oqıwǵa usınıs etilgen student-jaslar hám olardıń ata-anaları, ǵalaba xabar quralları xızmetkerleri qatnastı.

Bayram ilajın institut rektorı Alisher Ubbiyev ashıp berdi hám qatnasıwshılardı ǵárezsizligimizdiń 34 jıllıq bayramı, sonday-aq, jańa oqıw jılınıń baslanıwı menen qutlıqladı.

Atap ótilgenindey, jańa oqıw jılınıń baslanıwı – hám bilimlendiriw procesinde, hám jámiyetlik turmısımızdaǵı úlken áhmiyetke iye bolǵan, jaslarımızdı jańa maqsetlerge qaray baǵdarlaytuǵın waqıya bolıp esaplanadı.

Ǵárezsiz mámleketimizde jaslar tálim-tárbiyasına, ilimniń rawajlanıwına qaratılıp atırǵan joqarı itibar búgin taraw qánigeleriniń aldına úlken juwapkershilik júklemekte. Prezidentimizdiń ǵamqorlıǵı menen jaratılıp atırǵan keń imkaniyatlar nátiyjesinde institutta da zamanagóy bilimlendiriw ortalıǵın qáliplestiriw, jaslardı qollap-quwatlaw, olardıń baslamaları hám ideyaların ámelge asırıw ushın barlıq sharayatlar jaratılmaqta.

Ótken jılı instituttıń zamanagóy sharayatlarǵa iye bolǵan jańa oqıw imaratı paydalanıwǵa tapsırılǵan bolsa, bıyılǵı jılı 500 orınǵa mólsherlengen 3-sanlı studentler turaq jayı, zamanagóy sport kompleksi, sonday-aq, futbol, jeńil atletika hám basketbol ushın arnalǵan kóp funkciyalı sport maydanınıń paydalanıwǵa tapsırılǵanlıǵı keleshek iyeleriniń ilim-bilim sırların tereń meńgeriwi, hám fizikalıq, hám intellektuallıq jaqtan jetik áwlad bolıp jetisiwi ushın xızmet eteri sózsiz.

Respublikamızdaǵı tuńǵısh joqarı oqıw ornı, óziniń 90 jıldan aslam tariyxına iye bolǵan pedagogikalıq institutta oqıwdı niyet etken elimizdiń on mıńlaǵan jasları arasınan bakalavriattıń kúndizgi hám keshki tálim baǵdarlarına eki mıńnan aslam, al magistratura qánigeliklerine eki júzge shamalas jaslar oqıwǵa usınıs etildi.

– Búgin meniń ómirimdegi eń umıtılmas kúnlerdiń biri. Óytkeni, men usı instituttıń tolıq aǵzasına aylandım. Bul dárgay – ilim hám aǵartıwshılıq orayı, jaslardıń arzıwların ámelge asırıwga tiykar jaratatuǵın oqıw ornı. Men 7 jıldan berli Jaslar awqamı sistemasında sárdar bolıp jumıs islep atırman. Usı baǵdardaǵı jumıslarım sebepli Ózbekstan Respublikası Ministrler Kabinetiniń 914-sanlı qararı tiykarında instituttıń milliy ideya, ruwxıylıq tiykarları hám huqıq tálimi baǵdarına mámleketlik grant tiykarında oqıwǵa qabıl etildim. Elimizdegi tuńǵısh joqarı oqıw ornı esaplanǵan bul dárgayda Ózbekstan Qaharmanları, akademikler, mámleketlik hám jámiyetlik ǵayratkerler jetisip shıǵıp, xalqımızǵa xızmet etken. Men de olardıń jolın úlgi tutıp, usı oqıw ornında oqıwdı maqset etken edim. Búgin óz maqsetime eristim. Álbette, institutta bilim hám kónlikpelerimdi bunnan bılay da jetilistirip, keleshekte mámleketimizdiń bilimlendiriw tarawınıń rawajlanıwına óz úlesimdi qosıw niyetindemen, – deydi Gúlbáhár Yusupbekova.

Ilajda Qaraqalpaqstan Respublikası Mektepke shekemgi hám mektep bilimlendiriwi ministriniń birinshi orınbasarı Aybek Dáwletbaev, institutqa húkimetlik qararlar menen jeńillikli túrde mámleketlik grant tiykarında oqıwǵa qabıl etilgen jaslar sózge shıǵıp, elimizde jaslardıń joqarı bilim alıwı, kásip-óner úyreniwi, ilim menen shuǵıllanıp, óz qábiletlerin júzege shıǵarıwı baǵdarında jaratılıp atırǵan sharayatlardı atap ótti hám mámleketimiz, húkimetimiz basshılarına, institut jámáátine minnetdarshılıq bildirdi.

Institutta jańa oqıw jılı «Ǵárezsizlik sabaqları» hám «Tanısıw hápteligi» menen dawam etpekte.

NMPI baspasóz xızmeti.