Búgin, 4-sentyabr kúni Ájiniyaz atındaǵı Nókis mámleketlik pedagogikalıq institutı Tariyx fakultetiniń bir topar belsendi student-jasları jaslar máseleleri hám ruwxıy-aǵartıwshılıq isleri boyınsha birinshi prorektor Quvondiq Qodirov hám ustazları basshılıǵında Qaraqalpaq mámleketlik universiteti quramında shólkemlestirilgen Repressiya qurbanları esteligi muzeyine bardı.

Siyasiy repressiya qurbanı bolǵan jerleslerimizdiń ómiri hám xızmetlerin úyreniw, úgit-násiyatlaw hám olardıń esteligin máńgilestiriw maqsetinde shólkemlestirilgen ilajda student-jaslar 1937-1953-jıllarda, sonıń menen birge, ótken ásirdiń 80-jıllarında júz bergen repressiyalar tariyxın sáwlelendiretuǵın hújjetler, fotosúwretler, arxiv materialları jáne repressiya qurbanlarınıń jeke buyımları menen tanıstı.

Sonday-aq, olar ǵárezsizlik sebepli tariyxıy ádillik ornatılǵanı, xalqımızdıń azatlıǵı hám baxıtlı keleshegi jolında janın pidá etken ata-babalarımızdıń esteligi joqarı húrmet penen qádirlenetuǵınlıǵı haqqında tolıq maǵlıwmatlarǵa iye boldı.

Muzeyge sayaxat student-jaslardıń kewillerinde tariyx sabaqların este saqlaw, milliy maqtanısh hám watanǵa bolǵan súyispenshilik sezimlerin ele de bekkemlewge xızmet etti.

NMPI baspasóz xızmeti.