Ájiniyaz atındaǵı Nókis mámleketlik pedagogikalıq institutı 3-sanlı studentler turaq jayında Qaraqalpaqstan Respublikası Ayrıqsha jaǵdaylar basqarması hám Ózbekstan Respublikası Milliy gvardiyası Qaraqalpaqstan Respublikası boyınsha basqarması menen birgelikte arnawlı-taktikalıq oqıw shınıǵıwı ótkerildi.

Oqıw orınlarında órtler hám basqa ayrıqsha jaǵdaylar júz bergende studentler hám jumıs islewshilerdiń durıs háreketleniwi boyınsha bilim jáne kónlikpelerin arttırıw maqsetinde shólkemlestirilgen ilajǵa Qaraqalpaqstan Respublikası Ayrıqsha jaǵdaylar basqarması baslıǵınıń birinshi orınbasarı – Shtab baslıǵı, polkovnik Baxtiyar Orazbaev, instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov, profilaktikalıq inspektorlar, tiyisli bólim baslıqları, dekan orınbasarları, tyutorlar hám studentler qatnastı.

Ilajda ayrıqsha jaǵdaylarda durıs háreketleniw hám qarar qabıl etiw tártibi oqıw shınıǵıwı qatnasıwshılarına jaǵdaylardı modellestiriw arqalı interaktiv usıllardan paydalanǵan halda jetkerildi.

Arnawlı-taktikalıq oqıw shınıǵıwın ótkeriw dawamında gúz-qıs máwsiminde júz beriwi múmkin bolǵan ayrıqsha jaǵdaylar hám baxıtsız hádiyselerdiń aldın alıwǵa baǵdarlanǵan profilaktikalıq ilajlar ámelge asırıldı.

NMPI baspasóz xızmeti.