Ájiniyaz atındaǵı Nókis mámleketlik pedagogikalıq institutında studentler hám professor-oqıtıwshılar arasında ótkerilgen «Eko-innovaciya – 2025» atamasındaǵı ekologiyalıq mashqalalardı sheshiwge baǵıshlanǵan innovaciyalıq qollanbalar hám joybarlar kórgizbesi zamanagóy ilim, bilimlendiriw hám ekologiya integraciyasınıń ayqın úlgisi boldı.

Ilajda jas izleniwshiler ekologiyalıq mashqalalar boyınsha ózleriniń innovaciyalıq ideya hám joybarların usınıs etip, shıǵındılardı qayta islew, atmosfera hawasın qorǵaw, suw resurslarınan nátiyjeli paydalanıw, jasıl energetika sıyaqlı áhmiyetli máselelerge sheshim usındı. Bul process olarda ekologiyalıq pikirlewdi tereńlestiredi hám ilimiy-izertlew kompetenciyaların qáliplestiredi.

Ilajda ilimiy isler hám innovaciyalar boyınsha prorektor Quwanıshbay Seytnazarov, sonday-aq, ilimiy basshı hám ekspert sıpatında qatnasqan professor-oqıtıwshılar joybarlardıń teoriyalıq tiykarlanıwı, metodologiyalıq durıslıǵı hám ámeliy áhmiyetin bahaladı. Sonday-aq, olar jaslardıń innovaciyalıq qollanbaların jetilistiriw boyınsha ilimiy usınıslar berdi.

«Eko-innovaciya – 2025» kórgizbesi studentler hám professor-oqıtıwshılardıń birge islesiwinde ekologiyalıq mashqalalarǵa innovaciyalıq sheshim tabıwǵa baǵdarlanǵan ilimiy-ámeliy maydan bolıp, institutta ekologiyalıq mádeniyattı rawajlandırıw hám turaqlı rawajlanıw koncepciyasın keńnen úgit-násiyatlawda úlken áhmiyetke iye boldı.

NMPI baspasóz xızmeti.