Ájiniyaz atındaǵı Nókis mámleketlik pedagogikalıq institutında Koreya Respublikasınıń Sejong til úyreniw orayı wákilleri Hur Seon Haeng hám Lee Sang Shik penen ushırasıw bolıp ótti.

Ushırasıwǵa Qaraqalpaqstan Respublikası Joqarǵı Keńesi Baslıǵınıń Koreya Respublikası menen sawda-satıq, investiciya hám ekonomikalıq baylanıslar boyınsha másláhátshisi Gózzal Shamuratova, institut rektorı Alisher Ubbiyev, oqıw isleri boyınsha prorektorı Muxtar Ibragimov hám xalıqaralıq birge islesiw bóliminiń juwapkerleri qatnastı.

Ilajda rektor Alisher Ubbiyev házirgi waqıtta Ózbekstan hám Koreya Respublikası arasındaǵı ilim, bilimlendiriw, mádeniy-gumanitar tarawlar boyınsha birge islesiwdiń nátiyjeli dawam etip atırǵanın atap ótip, miymanlardı elimizge saparı menen qutlıqladı. Sonday-aq, institutta ilimiy-pedagogikalıq baǵdarda xalıqaralıq birge islesiw boyınsha ámelge asırılıp atırǵan jumıslar tuwralı maǵlıwmatlar berdi.

Ushırasıw dawamında Koreya Respublikasınıń aldınǵı joqarı oqıw orınları menen eki tárepleme birge islesiwdi jolǵa qoyıw, institut professor-oqıtıwshıları hám studentleriniń akademiyalıq mobillik, stajirovkalar hám oqıw baǵdarlamaları sheńberinde grant joybarlarında qatnasıwına kómeklesiw, institutta koreys tilin oqıtıw imkaniyatları, koreys tili boyınsha jetik qánigelerdi tayarlaw máseleleri dodalanıp, aldaǵı waqıtlarda birgelikte ámelge asırılatuǵın jumıslar kórip shıǵıldı.

Ilaj juwmaǵında miymanlar institutta shólkemlestirilgen Koreys tili xanası menen tanısıp, bul jerdegi oqıw ádebiyatları menen támiyinlew jumıslarına ayrıqsha baha berdi.

Bul ushırasıw institutta Koreya Respublikasınıń bilimlendiriw shólkemleri menen xalıqaralıq birge islesiwdi jańa basqıshqa kóteriwde ayrıqsha áhmiyetke iye boldı.

NMPI baspasóz xızmeti.