Ájiniyaz atındaǵı Nókis mámleketlik pedagogikalıq institutında Belarus Respublikası Joqarı texnologiyalar parki rezidenti «FoksTri» jámiyetiniń wákilleri – Dmitriy Baxmat, Andrey Krugley hám Dmitriy Narubin menen ushırasıw bolıp ótti.

Miymanlardı institut rektorı Alisher Ubbiyev, ilimiy isler hám innovaciyalar boyınsha prorektor Quwanıshbay Seytnazarov, sonday-aq, xalıqaralıq birge islesiw bóliminiń juwapkerleri kútip aldı.

Ushırasıwda joqarı oqıw orınlarında, sonıń ishinde, institutta zamanagóy sanlı texnologiyalardı engiziw, kiberqáwipsizlik boyınsha zamanagóy málimleme texnologiyalarına oqıtıw máseleleri dodalandı.

Belaruslı qánigeler tárepinen usınılıp atırǵan platforma tutınıwshılar arasında málimleme almasıw nátiyjeliligin arttırıw, qáwipsiz dialog hám belsendi birge islesiwdi támiyinlewge xızmet etetuǵınlıǵı tuwralı maǵlıwmat berildi.

Tárepler joybardı ámelge asırıw sanlı transformaciya jolındaǵı áhmiyetli qádem bolatuǵınlıǵın hám qáwipsiz, nátiyjeli dialogtı támiyinlewge xızmet etetuǵınlıǵın atap ótip, aldaǵı waqıtta birge islesiwge tayar ekenligin bildirdi.

Maǵlıwmat ushın, «FoksTri» jámiyeti málimleme texnologiyaları tarawında unikal ónimler islep shıǵarıwǵa qánigelesken kompaniyalardıń biri bolıp tabıladı.

NMPI baspasóz xızmeti.