Ájiniyaz atındaǵı Nókis mámleketlik pedagogikalıq institutında student-jaslardı ilimiy-izertlew jumıslarına keń tartıw, innovaciyalıq hám startap joybarların ámeliyatqa engiziw ushın xalıqaralıq baǵdarlamalar hám grant joybarları haqqında maǵlıwmatlar beriw maqsetinde «Keleshekke qaray: «InnoX» biznes inkubator oqıw baǵdarlaması, «El-yurt umidi» qorı hám ataqlı mámleketlik stipendiyalar arqalı nátiyjege erisiw» atamasındaǵı seminar-trening bolıp ótti.

Seminarda studentler ilimiy-izertlewlerdi qollap-quwatlaw, sırt ellerde bilim alıw, ilimiy stajirovkalarda qatnasıw hám startap joybarlardı rawajlandırıw imkaniyatları haqqında tolıq maǵlıwmatlarǵa iye boldı.

Atap aytqanda, «InnoX» biznes inkubator oqıw baǵdarlaması boyınsha Nókis jaslar texnoparkiniń mentorı Erlan Kereev qatnasıwshılarǵa innovaciyalıq ideyalardı qáliplestiriw hám rawajlandırıw, startaplardı jaratıw basqıshları, biznes model dúziw hám investorlardı tartıw haqqında, instituttıń matematika kafedrasınıń oqıtıwshısı Aydos Qutbaev «El-yurt umidi» qorı arqalı sırt eldegi abıroylı joqarı oqıw orınları hám ilimiy oraylarda oqıw, ilimiy-izertlew jumısları menen shuǵıllanıw, qánigeligin jetilistiw haqqında, ziyrek studentlerdiń ilimiy-izertlew jumısların shólkemlestiriw bóliminiń baslıǵı Qahraman Tashanov bilimli hám qábiletli studentler ushın ataqlı mámleketlik stipendiyalar haqqında maǵlıwmatlar berdi.

Seminar dawamında studentlerge usınday jaratılǵan imkaniyatlardan paydalanıwdıń abzallıqları túsindirildi, sonday-aq, olardı qollap-quwatlaw mexanizmleri boyınsha ámeliy usınıslar bildirildi.

NMPI baspasóz xızmeti.