Pedagog kadrlar tayarlaw sistemasın bunnan bılay da jetilistiriw, tarawdı birden-bir qatnas tiykarında rawajlandırıw hám xalıqaralıq standartlarǵa sáykes islep shıǵıw boyınsha belgilengen wazıypalar sheńberinde Nızamiy atındaǵı Ózbekstan milliy pedagogikalıq universiteti wákilleri Ájiniyaz atındaǵı Nókis mámleketlik pedagogikalıq institutına keldi.

Miymanlar – universitettiń ilimiy isler hám innovaciyalar boyınsha prorektorı Farhod Alisherov, transformaciya isleri boyınsha prorektorı Rahmonjon Ahmadjonov ÓzMPUda ámelge asırılıp atırǵan transformaciya processleri, onıń strategiyası hám basqa pedagogikalıq joqarı oqıw orınlarına engiziw imkaniyatları, ilimiy hám innovaciyalıq baǵdardaǵı ulıwmalıq maqsetler hám wazıypalar, óz ara birge islesiwdi bekkemlew, tájiriybe almasıw hám birgeliktegi joybarlardı shólkemlestiriwdiń áhmiyetine toqtalıp, aldaǵı wazıypalar boyınsha pikir almastı.

Ushırasıwda instituttıń oqıw isleri boyınsha prorektorı Muxtar Ibragimov, ilimiy isler hám innovaciyalar boyınsha prorektorı Quwanıshbay Seytnazarov hám Anıq pánler fakultetiniń dekanatı jáne kafedra baslıqları mámleketimiz basshısınıń «Pedagog kadrlar tayarlaw sistemasın bunnan bılay da jetilistiriw ilajları haqqında»ǵı pármanı tiykarında ámelge asırılıp atırǵan jumıslar haqqında maǵlıwmat berdi.

Ilajda institutta Anıq pánler joqarı mektebiniń jumısların jolǵa qoyıw, jańa xalıqaralıq oqıw baǵdarlamaların engiziw, professor-oqıtıwshılardıń qánigeligin jetilistiriw, transformaciya procesin nátiyjeli basqarıw ushın jumısshı topar dúziw boyınsha usınıslar bildirildi.

Ushırasıw sońında tárepler bilimlendiriwdiń barlıq basqıshlarında óz ara birge islesiwdi bekkemlew hám turaqlı tájiriybe almasıwǵa kelisip aldı.

NMPI baspasóz xızmeti.