Ájiniyaz atındaǵı Nókis mámleketlik pedagogikalıq institutında úzliksiz (akademiyalıq tánepissiz) kúndizgi bilimlendiriw baǵdarlarında oqıp atırǵan 2-, 3- hám 4-kurs studentleri arasında «Eń belsendi jıl studenti» respublikalıq tańlawınıń institut basqıshına hújjetler qabıllanatuǵınlıǵın daǵazalaymız.

Tańlaw tómendegi nominaciyalar boyınsha ótkeriledi:

1) «Jıldıń óz qánigeligi boyınsha eń bilimli studenti»;

2) «Jıldıń eń belsendi úgit-násiyatshı studenti»;

3) «Jıldıń eń belsendi oylap tabıwshı-innovator studenti»;

4) «Jıldıń eń belsendi sportshı studenti»;

5) «Jıldıń eń belsendi qábiletli studenti» (reńli súwret, grafika, dizayn, ámeliy óner, músinshilik boyınsha);

6) «Jıldıń eń belsendi dóretiwshi studenti»;

7) «Jıldıń eń belsendi isbilermen studenti» (hayal-qızlar ushın).

Tańlawǵa institutta úzliksiz (akademiyalıq tánepissiz) kúndizgi bilimlendiriw baǵdarlarında oqıp atırǵan 2-, 3- hám 4-kurs studentleri qatnasa aladı.

Qatnasıwshıǵa tiyisli bolǵan tómendegi hújjetler toplamı fakultet dekanatı tárepinen tayarlanadı hám tańlaw komissiyasına usınıladı:

– qatnasıwshınıń qábileti, pánlerdi ózlestiriw dárejesi, jetekshilik qábileti, erisken tabısları, sabaqlardaǵı belsendi qatnası, studentlerge órnek bolatuǵın tárepleri hám jámiyetlik jumıslardaǵı belsendiligi haqqında maǵlıwmatlar jazılǵan eki betten kóp bolmaǵan kólemdegi usınısnama;

– tańlaw qatnasıwshısınıń pánlerdi ózlestiriw nátiyjeleri kórsetilgen hújjetlerdiń (bahalardı dizimge alıw betleri, studenttiń bahalardı ózlestiriw sınaw dáptershesi) nusqaları;

– tańlaw qatnasıwshısınıń basıp shıǵarılǵan ilimiy, ilimiy-metodikalıq, dóretiwshilik jumısları, olarǵa tiyisli qánigelerden alınǵan pikirler menen birge dóretiwshilik jumıslarınıń elektron forması;

– xalıqaralıq hám respublikalıq kólemde ótkerilgen ilajlar, tańlawlarda húrmet jarlıqları hám diplomlar menen sıylıqlanǵanı haqqındaǵı maǵlıwmatlar (nusqaları qosımsha etiledi);

– grantlarǵa qatnasqanlıǵı haqqındaǵı maǵlıwmatnama, granttıń ataması, qarjılandırıw kólemi, qatnasıwınıń forması hám dárejesi kórsetiledi;

– konferenciyalarǵa qatnasqanı haqqındaǵı maǵlıwmatlar, ilimiy jumıslarınıń dizimi hám ilimiy jumıslarınıń nusqaları qosımsha etiledi;

– hújjetler toplamına kirgizilgen materiallar hám maǵlıwmatlar usı jıl dawamında basıp shıǵarılǵan bolıwı kerek.

Tańlaw komissiyası qatnasıwshılardıń hújjetler toplamı, sabaqlarǵa hám jámiyetlik jumıslarǵa qatnasıwınıń sapasın, sonday-aq, qatnasıwshı menen individual ótkerilgen sáwbet sheńberinde alınǵan maǵlıwmatlardı bahalaw nátiyjelerin esapqa alǵan halda hár bir nominaciya boyınsha jeńimpaz (1-, 2- hám 3-orın)lardı anıqlaydı jáne 1-orın jeńimpazların tańlawdıń respublikalıq basqıshında qatnasıw ushın usınıs etedi.

Nominaciyalar boyınsha 1-, 2- hám 3-orınlardı iyelegen jeńimpaz jáne sıylı orın iyeleri joqarı oqıw ornınıń húrmet jarlıǵı menen sıylıqlanadı hám tiyisli ráwishte 1-orın iyesi bazalıq esaplaw muǵdarınıń 8 esesi muǵdarında, 2-orın iyesi bazalıq esaplaw muǵdarınıń 6 esesi muǵdarında hám 3-orın iyesi bazalıq esaplaw muǵdarınıń 4 esesi muǵdarında materiallıq jaqtan xoshametlenedi.

Tańlawǵa hújjetlerdi instituttıń jaslar menen islesiw hám ruwxıy-aǵartıwshılıq bólimine usı jıldıń 25-oktyabr sánesine shekem tapsırıwıńız múmkin.

Qosımsha maǵlıwmatlardı tómendegi kórsetilgen «Eń belsendi jıl studenti» respublikalıq tańlawınıń ustavı arqalı bilip alıwıńız múmkin.

«Eń belsendi jıl studenti» respublikalıq tańlawınıń ustavı

NMPI baspasóz xızmeti.