Ájiniyaz atındaǵı Nókis mámleketlik pedagogikalıq institutı Filologiya fakultetinde «Ashıq esikler kúni» ilajı sheńberinde student-jaslardıń ata-anaları menen ushırasıw shólkemlestirildi.

Ushırasıwǵa fakultet dekanatı wákilleri, kafedralardıń baslıqları, professor-oqıtıwshılar, tyutorlar, studentler hám olardıń ata-anaları qatnastı.

Ilajdıń baslı maqseti – ata-analardı perzentleriniń bilim alıwı, tálim-tárbiya jumıslarınıń barısı, jasaw sharayatları hám fakultetlerdegi jaratılǵan imkaniyatlar menen jaqınnan tanıstırıw, sonday-aq, jaslar arasında hár qıylı jınayatshılıq hám huqıqbuzarlıqlardıń aldın alıw, olardıń qáwipsizligin támiyinlew boyınsha nátiyjeli birge islesiwdi jolǵa qoyıwdan ibarat boldı.

Ushırasıwda fakultet dekanı Gulbahar Begmuratova sózge shıǵıp, fakultettegi bilimlendiriw sapası, oqıw procesin jetilistiriw, studentlerdiń ilimiy-dóretiwshilik belsendiligin arttırıw, bos waqıtların mazmunlı shólkemlestiriw boyınsha ámelge asırılıp atırǵan jumıslar tuwralı tolıq maǵlıwmat berdi.

Sonıń menen birge, institutta, studentler turaq jayları hám ijara úylerinde tártip-qaǵıydalarǵa ámel etiw, ásirese, kóp qabatlı turaq jaylarda ijarada jasaytuǵın jaslar arasında gazden záhárleniwdiń aldın alıw, studentlerdiń qáwipsizligin támiyinlew máseleleri boyınsha pikir almasıldı. Ata-analardıń pikir-usınısları tıńlanıp, sorawlarına tolıq juwaplar berildi.

Ilaj sońında oqıwda hám jámiyetlik jumıslarda ayrıqsha belsendilik kórsetip kiyatırǵan studentlerdiń ata-analarına minnetdarshılıq xatları tapsırıldı.