Ájiniyaz atındaǵı Nókis mámleketlik pedagogikalıq institutı Ellikqala fakultetinde studentlerdiń ata-anaları menen ushırasıw bolıp ótti.

Ilajdıń tiykarǵı maqseti – bilimlendiriw procesiniń nátiyjeliligin arttırıw, studentler ushın jaratılǵan sharayatlar menen ata-analardı jaqınnan tanıstırıw hám olardıń pikir-usınısların úyreniwden ibarat boldı.

Ushırasıwda Ellikqala fakulteti dekanı Ergash Asamaddinov shıǵıp sóylep, ata-analarǵa oqıw procesin shólkemlestiriw, studentlerdiń sabaqlarǵa qatnasıwı, reyting sisteması, ishki tártip-qaǵıydalar hám bilimlendiriwdiń sapasın arttırıw baǵdarında ámelge asırılıp atırǵan jumıslar haqqında maǵlıwmat berdi.

Ushırasıw dawamında ata-analar perzentleriniń oqıw procesindegi jetiskenlikleri hám mashqalaları haqqında óz pikirlerin bildirip, oqıtıwshılar, tyutorlar hám fakultet basshıları menen ashıq sáwbetlesti.

Ilaj sońında belsendi jaslardıń ata-analarına minnetdarshılıq xatları tapsırıldı.