Gúz-qıs máwsiminiń baslanıwı múnásibeti menen Ájiniyaz atındaǵı Nókis mámleketlik pedagogikalıq institutında ijara úylerde jasap atırǵan student-jaslardıń qáwipsizligin támiyinlew, hár qıylı baxıtsız hádiyselerdiń, atap aytqanda, záhárli gazden zıyanlanıw jaǵdaylarınıń aldın alıw maqsetinde ámeliy jumıslar baslap jiberildi.

Bul process sheńberinde hár bir fakultet kesiminde arnawlı jumısshı toparlar (otryadlar) dúzilip, olar tárepinen studentler jasap atırǵan ijara úylerinde profilaktikalıq ilajlar ótkerilmekte. Atap aytqanda, morılardıń tazalıǵı, jılıtıw úskeneleriniń durıs ornatılǵanı, órt qáwipsizligi qurallarınıń jaǵdayı hám paydalanıw qaǵıydalarına ámel etiliwi úyrenildi. Úyreniw jumısları dawamında anıqlanǵan kemshilikler arnawlı jumısshı topar (otryad) aǵzaları tárepinen ornında saplastırılmaqta.

Sonday-aq, studentlerge záhárli gazden zıyanlanıwdıń aldın alıw, órt qáwipsizligi hám tazalıqqa ámel etiw boyınsha ámeliy kórsetpeler berilip, úgit-násiyat jumısları alıp barıldı. Bunday ilajlardıń tiykarǵı maqseti – jaslardıń ómiri hám densawlıǵın qorǵaw, olardıń qáwipsiz sharayatta jasawın támiyinlewden ibarat.

Institut basshıları tárepinen bul baǵdardaǵı jumıslar turaqlı qadaǵalawǵa alınǵan bolıp, gúzgi-qısqı máwsimde bunday profilaktikalıq ilajlar turaqlı túrde dawam ettiriledi.

NMPI baspasóz xızmeti.