Ájiniyaz atındaǵı Nókis mámleketlik pedagogikalıq institutında student-jaslardı ǵalabalıq sportqa keńnen tartıw, salamat turmıs tárizin úgit-násiyatlaw hám sport dógerekleriniń jumısların sáwlelendiriw maqsetinde media-tur shólkemlestirildi.

Media-turǵa respublikalıq hám jergilikli ǵalaba xabar quralları wákilleri, jurnalistler, blogerler qatnasıp, institutta sport infrastrukturasın rawajlandırıw, studentlerdiń bos waqıtların mazmunlı ótkeriw hám sawallandırıw ilajların jolǵa qoyıw boyınsha ámelge asırılıp atırǵan jumıslar menen jaqınnan tanıstı.

– Házirgi waqıtta institutta 13 mıńǵa shamalas student bilim alıp atırǵan bolıp, olardan kúndizgi tálim baǵdarlarında oqıp atırǵan jaslardıń 62 procenti sport dógereklerine qamtıp alınǵan. Institut sport klubı, sonday-aq, dene tárbiya hám sport kafedrası tárepinen hár bir fakultet kesiminde «Bes baslama olimpiadası», «Studentler ligası», «Universiada», «Ministr kubogi» hám «Rektor kubogi» sıyaqlı sport jarısları turaqlı ótkeriledi. Jámi 9 sport túri – voleybol, basketbol, futbol, shaxmat, futzal, gandbol, kurash, jeńil atletika hám stol tennisi boyınsha sport dógereklerinde jaslar turaqlı túrde sport penen shuǵıllanbaqta, – deydi institut sport klubı baslıǵınıń orınbasarı Miralım Allanazarov.

Usı maqsette institutta materiallıq-texnikalıq bazanı bekkemlew, jaslar ushın qosımsha qolaylıqlar jaratıwǵa ayrıqsha itibar qaratılǵan. Atap aytqanda, zamanagóy standartlarǵa juwap beretuǵın 300 orınǵa mólsherlengen futbol stadionı, 100 orınlıq basketbol hám voleybol maydanshası, jańa sport kompleksi hám sport sarayı, 2 jabıq sport zalı, 2 jasalma qaplamalı mini futbol hám sırtqı sport maydanshaları student-jaslar ushın xızmet etpekte.

Mine, usınday sharayatlar hám imkaniyatlardan nátiyjeli paydalanıp atırǵan studentler sport jarıslarınıń respublikalıq basqıshlarında, sonday-aq, mámleket birinshilikleri, Aziya hám jáhán chempionatlarında joqarı nátiyjelerge erisip kelmekte.

Ayrıqsha atap ótiw orınlı, «Universiada» sport jarıslarında institut sportshı studentleriniń qolǵa kirgizgen jetiskenlikleri nátiyjesinde 2019- hám 2023-jıllarda institutqa sport inventarlarınan ibarat Prezident sawǵaları tapsırılǵan bolsa, voleybol hám regbi-7 sport túrleri boyınsha institut studentleri mámleketimizdiń saylandı komandası quramında Aziya hám basqa da xalıqaralıq sport jarıslarında qatnasıp, joqarı nátiyjelerdi qolǵa kirgizip kelmekte.

Media-tur qatnasıwshıları sport dógerekleriniń jumısları, studentlerdiń qolǵa kirgizip atırǵan tabısları, jarıslardaǵı erisken nátiyjeleri hám institutta jaratılǵan sharayatlar haqqında tolıq maǵlıwmatlarǵa iye boldı.

Media-tur institutta ámelge asırılıp atırǵan sport-sawallandırıw ilajların keń jámiyetshilikke jetkerip beriwde úlken áhmiyetke iye boldı.

NMPI baspasóz xızmeti.