Ájiniyaz atındaǵı Nókis mámleketlik pedagogikalıq institutı ilimiy isler hám innovaciyalar boyınsha prorektorı Quwanıshbay Seytnazarov Italiyadaǵı eń abıroylı joqarı oqıw orınlarınıń biri – Veneciyanıń Ka Foskari universiteti xalıqaralıq baylanıslar boyınsha prorektorı Antonio Markomini menen ushırastı.

Ushırasıwda prorektor Quwanıshbay Seytnazarov institut tariyxı, búgingi kúndegi ilimiy-innovaciyalıq hám xalıqaralıq birge islesiw baǵdarındaǵı jumıslarınıń nátiyjeleri tuwralı maǵlıwmat berdi.

Ka Foskari universiteti 150 jıllıq tariyxqa iye bolǵan Evropadaǵı aldınǵı mámleketlik joqarı oqıw orınlarınıń biri bolıp, bul jerde studentler anıq hám gumanitar pánler, shet tilleri, menedjment hám ekonomika baǵdarları boyınsha bakalavriat hám magistratura basqıshlarında bilim aladı.

Ilajda pedagogika hám filologiya, ekologiya hám turaqlı rawajlanıw, texnologiyalar hám innovaciyalar, IT tarawında birge islesiw baǵdarları dodalandı.

Atap aytqanda, IT texnologiyalar, programmalastırıw, maǵlıwmatlar ilimi (Data Science) boyınsha bakalavriat hám magistratura basqıshlarında qospa bilimlendiriw baǵdarlamasın jolǵa qoyıw, professor-oqıtıwshılar hám studentler almasıwı, birgelikte ámeliy seminarlar hám laboratoriyalıq jumıslardı ótkeriw, sanlı texnologiyalar, jasalma intellekt, programmalıq támiynat, sonday-aq, olardı bilimlendiriw hám ekologiya tarawlarında qollanıw boyınsha birgeliktegi izertlewlerdi rawajlandırıw, texnologiyalıq rawajlanıw hám IT menen baylanıslı xalıqaralıq grantlarda birgelikte qatnasıw, joybarlar boyınsha eki joqarı oqıw ornı professor-oqıtıwshıları jáne studentleri islewi múmkin bolǵan IT-laboratoriya hám innovaciyalıq oray jaratıw sıyaqlı máseleler kórip shıǵıldı.

Ushırasıw sońında kórip shıǵılǵan máseleler boyınsha aldaǵı waqıtta birgelikte ámelge asırılatuǵın jumıslar belgilep alındı.

NMPI baspasóz xızmeti.