Ájiniyaz atındaǵı Nókis mámleketlik pedagogikalıq institutında gúz-qıs máwsiminiń baslanıwı menen ijara úylerde jasaytuǵın student-jaslar arasında záhárli gazden zıyanlanıwınıń aldın alıw hám órt qáwipsizligi qaǵıydalarına ámel etiwi boyınsha profilaktikalıq ilajlar sistemalı túrde ámelge asırılmaqta.

Búgin, 7-noyabr kúni instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basshılıǵında fakultet dekanları hám tiyisli juwapkerler menen ótkerilgen jıynalısta usı baǵdardaǵı jumıslardıń barısı, ámelge asırılǵan jumıslar hám aldaǵı wazıypalar dodalandı.

Atap ótilgenindey, házirgi waqıtta instituttıń 2359 studenti 1477 ijara úylerinde jasap atırǵan bolıp, búgingi kúnge shekem olardıń jasaw úyleri arnawlı jumısshı topar (otryad)lar tárepinen tolıq úyrenip shıǵılıp, qazanxana morıları tolıǵı menen tazalandı. Sonıń menen birge, jılıtıw úskenelerinen durıs paydalanıw, morılardı turaqlı túrde tazalap turıw, gaz úskeneleriniń texnikalıq jaǵdayın tekseriw boyınsha ámeliy kórsetpeler berildi.

Jıynalısqa gaz támiynatı boyınsha xızmet kórsetiw kárxanasınıń wákilleri de qatnasıp, jılıtıw hám gaz úskeneleriniń qáwipsizligin támiyinlew boyınsha arnawlı úskenelerdi ornatıw boyınsha óz másláhát hám usınısların bildirdi.

Bunday ilajlar student-jaslardıń jasaw sharayatların bunnan bılay da qáwipsiz hám qolaylı etiwge xızmet eteri sózsiz.

NMPI baspasóz xızmeti.