Ájiniyaz atındaǵı Nókis mámleketlik pedagogikalıq institutında student-jaslar arasında kiberjınayatlardıń aldın alıw, internet tarmaqlarınan paydalanıwda huqıqıy mádeniyattı arttırıw hám málimleme qáwipsizligin támiyinlewge baǵdarlanǵan úgit-násiyat ushırasıwı bolıp ótti.

Ilajǵa instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov, Qaraqalpaqstan Respublikası Ishki isler ministrligi Informaciyalıq texnologiyalar tarawındaǵı jınayatlarǵa qarsı gúresiw basqarmasınıń xızmetkeri Shuhrat Uzaqbergenov, institut profilaktikalıq inspektorı Miyrigúl Narımbetova, jaslar máseleleri boyınsha juwapkerler hám student-jaslar qatnastı.

Ushırasıw dawamında sózge shıqqanlar búgingi kúnde internet tarmaǵında ushırasıp atırǵan hár qıylı kiberjınayatlar, olardıń jámiyet hám adamlar turmısına unamsız tásiri haqqında maǵlıwmat berdi. Sonday-aq, jaslardı bunday jınayatlardıń aldın alıwda sergeklikke, internetten juwapkershilik penen paydalanıwǵa shaqırdı.

Ilaj qatnasıwshılarına kiberjınayatlardıń eń kóp ushırasıp atırǵan túrleri – sociallıq tarmaqlar arqalı zıyanlı fayllardı ashıw, jalǵan saytlar arqalı aldawshılıq, jeke maǵlıwmatlardı urlaw, kiberbulling, onlayn aldawshılıq sıyaqlı jaǵdaylar haqqında ámeliy mısallar járdeminde tanıstırıp ótildi.

Ushırasıw juwmaǵında studentler ózlerin qızıqtırǵan sorawlarǵa juwap aldı.

Bul ushırasıw jaslar arasında kibersergeklikti arttırıw, olardı málimleme qáwipsizligi mádeniyatına úyretiwde ayrıqsha áhmiyetke iye boldı.

NMPI baspasóz xızmeti.