Ózbekstan Prezidenti Shavkat Mirziyoyev basshılıǵında usı jıldıń 19-noyabr kúni máhállelerde xalıqtıń dáramatın arttırıw, kámbaǵallıq hám jumıssızlıqtı qısqartıw boyınsha islengen jumıslar hám 2026-jıldaǵı wazıypalarǵa baǵıshlanǵan videoselektor májilisinde jaslar, sonıń ishinde, joqarı oqıw orınları pitkeriwshileriniń bántligin támiyinlew máseleleri kórip shıǵılıp, juwapkerlerge tiyisli wazıypalar berilgen edi.

Usı wazıypalardan kelip shıǵıp, búgin, 20-noyabr kúni Qońırat rayonında Oliy Majlis Senatınıń Ilim, bilimlendiriw hám densawlıqtı saqlaw máseleleri komiteti baslıǵınıń orınbasarı Oral Ataniyazova hám Qaraqalpaqstan Respublikası Joqarı bilimlendiriw, ilim hám innovaciyalar ministri Amanjol Ayapov basshılıǵında májilis ótkerildi.

Májiliste jaslardıń bántligin támiyinlew, ásirese, student-jaslardı kásip-óner iyelewge baǵdarlaw, jumısqa ornalastırıw, sonday-aq, aldaǵı waqıtları da pitkeriwshilerdi turaqlı jumıs orınları menen támiyinlew boyınsha máseleler atap ótildi.

Ilaj sheńberinde Ájiniyaz atındaǵı Nókis mámleketlik pedagogikalıq institutınıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basshılıǵındaǵı instituttıń juwapker wákilleri rayondaǵı bir qatar mektepke shekemgi bilimlendiriw shólkemleri hám ulıwma bilim beriw mekteplerinde bolıp, pitkeriwshilerdiń jumısqa ornalasıw jaǵdayları, olardıń miynet sharayatları menen tanıstı.

Bilimlendiriw mákemeleriniń basshıları hám tiyisli juwapkerleri menen sáwbetlesip, aldaǵı birge islenetuǵın jumıslar belgilep alındı.