Búgin, 21-noyabr kúni Ájiniyaz atındaǵı Nókis mámleketlik pedagogikalıq institutında pitkeriwshilerdiń bántligin támiyinlew, ásirese, «Keleshekke qádem» baǵdarlaması sheńberinde olardıń biznes ideyaların qollap-quwatlaw hám ámelge asırıwǵa kómeklesiw maqsetinde seminar-trening bolıp ótti.

Ilajda instituttıń oqıw isleri boyınsha prorektorı Muxtar Ibragimov, «Ózmilliybank» AJ Qaraqalpaqstan Respublikası filialı baslıǵınıń orınbasarı Damir Qalqorazov, «JAK MEBEL» jámiyetiniń baslıǵı Ádilbek Saparniyazov, instituttıń «Keleshekke qádem» orayınıń juwapkerleri «Keleshekke qádem» baǵdarlamasınıń mazmunı hám áhmiyeti jóninde qatnasıwshılarǵa tolıq maǵlıwmatlar berdi.

Óz biznes ideyaların ámelge asırıw niyeti bolǵan pitkeriwshi kurs studentleri biznes ideyanı tayar joybarǵa shekem jetkeriw procesinde tolıq birge islesiw hám qolaylı shártlerde qarjılandırıw, tarawlar boyınsha ashıq tańlawlar ótkeriw hám jeńimpazlardı jumıs penen támiyinlewge kómeklesiw sıyaqlı máseleler boyınsha ózlerin qızıqtırǵan sorawlarǵa juwaplar aldı.

Sonday-aq, ilaj dawamında «Keleshekke qádem» baǵdarlaması sheńberinde jeńilletilgen kredit qarjıların alıp, óz isbilermenligin baslaǵan jaslar sózge shıǵıp, ámelge asırıp atırǵan jumısları haqqında maǵlıwmat berdi.

Seminar juwmaǵında belsene qatnasqan jaslar xoshametlendi.

NMPI baspasóz xızmeti.