Ájiniyaz atındaǵı Nókis mámleketlik pedagogikalıq institutında hayal-qızlardıń jámiyetlik turmısta tutqan ornı, bilimlendiriw sistemasındaǵı belsendiligi jáne olardıń huqıqları menen máplerin qorǵaw máselelerine baǵıshlanǵan ashıq sáwbetlesiw shólkemlestirildi.

Ilajda institut rektorınıń hayal-qızlar máseleleri boyınsha másláhátshisi Sayyora Bekchanova, fakultet dekanlarınıń hayal-qızlar máseleleri boyınsha másláhátshileri, professor-oqıtıwshılar, psixologlar hám juwapker qánigeler qatnastı.

Sáwbetlesiw dawamında mámleketimizde hayal-qızlardı qollap-quwatlaw, olardıń potencialın júzege shıǵarıw, jámiyetlik-siyasiy processlerdegi qatnasın keńeytiw baǵdarında ámelge asırılıp atırǵan reformalar haqqında tolıq maǵlıwmat berildi. Bilimlendiriw tarawında qızlardıń bilim alıwı, kásiplik rawajlanıwı, jetekshilik kónlikpelerin qáliplestiriw hám olar ushın qáwipsiz, qolaylı bilimlendiriw ortalıǵın jaratıw boyınsha alıp barılıp atırǵan ámeliy jumıslar ayrıqsha atap ótildi.

Sonday-aq, sáwbetlesiw barısında hayal-qızlardıń huqıqları menen máplerin qorǵaw, shańaraqlıq mashqalalardıń erte aldın alıw, psixologiyalıq járdem kórsetiw sistemasın kúsheytiw, sociallıq qollap-quwatlaw mexanizmlerin bunnan bılay da jetilistiriw boyınsha pikir almasıldı. Qatnasıwshılar tárepinen alǵa qoyılǵan pikir-usınıslar juwapkerler tárepinen hár tárepleme dodalandı.

Ilaj ashıq pikirlesiw ruwxında ótip, hayal-qızlardıń bilimlendiriw hám jámiyettegi belsendiligin arttırıwǵa xızmet etetuǵın bir qatar áhmiyetli baslamalardı belgilep alıwǵa imkaniyat jarattı.

NMPI baspasóz xızmeti.