Ájiniyaz atındaǵı Nókis mámleketlik pedagogikalıq institutı rektoratı, Jaslar awqamı baslanǵısh shólkemi hám Filologiya fakulteti dekanatı baslaması menen 1-dekabr – Qaraqalpaq tili bayramı kúni hám qaraqalpaq tiline mámleketlik til biyligi berilgeniniń 36 jıllıǵına arnap ǵalabalıq diktant ilajı shólkemlestirildi.

Ilajǵa instituttıń barlıq fakultetlerinen student-jaslar, professor-oqıtıwshılar, tyutorlar, pedagog hám qánige xızmetkerler – ulıwma 300 ge shamalas adam qatnastı.

Ǵalabalıq diktanttı ótkeriwden baslı maqset institut jámááti, sonıń ishinde, jaslar arasında qaraqalpaq tiline húrmet sezimin kúsheytiw, sawatlılıq mádeniyatı hám qaraqalpaq tiliniń abıroyın ele de arttırıwdan ibarat boldı.

Diktant procesinde qatnasıwshılar ushın qaraqalpaq tiliniń jámiyettegi ornı haqqında jazılǵan tekst saylap alındı. Qatnasıwshılar belgilengen waqıt dawamında tekstti qaraqalpaq tiliniń imla qaǵıydalarına sáykes túrde jazıwǵa háreket etti.

Ǵalabalıq diktant juwmaqları boyınsha jeńimpaz bolǵan hám belsene qatnasqan jaslar shólkemlestiriwshiler tárepinen til bayramı keshesinde saltanatlı túrde sıylıqlanadı.

Ilaj qaraqalpaq tiliniń mámleketlik til sıpatındaǵı dárejesi, tariyxıy áhmiyeti hám búgingi kúnde onıń qollanıw sheńberin keńeytiw baǵdarındaǵı jumıslardı úgit-násiyatlawǵa xızmet etti.

Jaslar arasında qaraqalpaq tiline bolǵan húrmetti ele de bekkemlewge baǵdarlanǵan bunday aǵartıwshılıq ilajları aldaǵı waqıtlarda da dawam etedi.

NMPI baspasóz xızmeti.