Ájiniyaz atındaǵı Nókis mámleketlik pedagogikalıq institutında 25-noyabr – Hayal-qızlarǵa qaratılǵan zorlıqtı saplastırıw xalıqaralıq kúni múnásibeti menen ótkerilip atırǵan 16 kúnlik globallıq akciya sheńberinde ushırasıw bolıp ótti.

«Hayal-qızlarǵa qaratılǵan sanlı zorlıqqa shek qoyıw ushın birleseyik» atamasında shólkemlestirilgen ilajǵa Qaraqalpaqstan Respublikası Ishki isler ministrligi Jámiyetlik qáwipsizlik xızmeti huqıqbuzarlıqlar profilaktikası basqarması baslıǵınıń orınbasarı, podpolkovnik Húrzada Reyimqulova, Qaraqalpaqstan Respublikası Hayal-qızlardı reabilitaciyalaw hám beyimlestiriw orayınıń baslıǵı Sayyora Nasırova, institut rektorınıń hayal-qızlar máseleleri boyınsha másláhátshisi Sayyora Bekchanova, psixolog Gúljamal Tóreniyazova, Mektepke shekemgi hám baslawısh tálim fakulteti dekanınıń hayal-qızlar máseleleri boyınsha másláhátshisi Sulıwxan Palwaniyazova, usı fakultet tyutorları hám student-qızlar qatnastı.

Ushırasıw dawamında hayal-qızlar arasında ushırasatuǵın zorlıqtıń túrleri, onıń sociallıq aqıbetleri, sonday-aq, bunday jaǵdaylardıń aldın alıw boyınsha ámelge asırılıp atırǵan mámleketlik siyasat hám kompleksli ilajlar haqqında tolıq maǵlıwmatlar berildi. Qánigeler tárepinen huqıqıy mádeniyattı arttırıw, shańaraqlıq qatnasıqlarda salamat ortalıqtı qáliplestiriw, kelispewshilikli jaǵdaylardı tınısh jol menen sheshiw boyınsha usınıslar bildirildi.

Sonday-aq, ushırasıw dawamında qatnasıwshılarǵa «Qorǵaw orderi», «Isenim telefonı», «Hayal-qızlar dápteri», «Temir dápter» sıyaqlı sistemalar arqalı kórsetilip atırǵan ámeliy járdemler, mashqalalı jaǵdaylarda múrájat etiw tártibi de túsindirildi.

Ilaj dawamında studentler menen ashıq sáwbetlesiw ótkerilip, olardıń sorawlarına qánigeler tárepinen tolıq juwaplap berildi. Hayal-qızlardı basım hám zorlıqtan qorǵawǵa baǵdarlanǵan videorolikler qatnasıwshılardıń dıqqatına usınıldı.

NMPI baspasóz xızmeti.