«Yuksalish» háreketi, «Search for Common Ground» xalıqaralıq kommerciyalıq emes shólkeminiń Ózbekstandaǵı filialı hám Korrupciyaǵa qarsı gúresiw agentligi tárepinen #Jasxabardar: «Jaslar korrupciyaǵa qarsı» joybarı shólkemlestirildi.

Qaraqalpaqstan Respublikası, Jizzaq hám Qashqadárya wálayatlarında ótkerilgen joybarǵa 16 jastan 29 jasqa shekemgi bolǵan jaslar, solar qatarında Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti biologiya tálim baǵdarınıń 3-kurs studenti Kúmisay Qızılbaeva da qatnastı.

– Joybar sheńberinde dáslep Nókis qalasında seminar-trening shólkemlestirildi. Onda medicina hám bilimlendiriw tarawlarında, jumısqa kiriwde qanday háreketler korrupciyalıq jaǵday ekenligi, bulardıń aldın alıw ushın ne islew kerekligi boyınsha túsinikler berildi. Trening qatnasıwshıları bunnan soń alǵan bilimleri tiykarında korrupciyaǵa qarsı gúresiwge baylanıslı kishi joybarlardı islep shıǵıp, prezentaciya isledi, – deydi Kúmisay.

Áhmiyetlisi, institutımız studenti Kúmisay Qızılbaevanıń komandası densawlıqtı saqlaw sistemasında ashıq-aydınlıqtı támiyinlew hám dári-darmaqlardı ádil túrde bólistiriwdi qadaǵalaw boyınsha islep shıqqan «Ashıq-aydınlıq hám ádillik» joybarı jeńimpaz dep tabıldı hám shólkemlestiriwshiler tárepinen 3000 AQSH dolları muǵdarındaǵı grant qarjısı menen sıylıqlandı.

NMPI baspasóz xızmeti.