Aldın xabar bergenimizdey, paytaxtımızdaǵı Jaslar orayında innovaciya, texnologiya hám jasalma intellektke tiykarlanǵan joybarlardı qollap-quwatlaw maqsetinde Qaraqalpaqstan Respublikası Joqarǵı Keńesi Baslıǵınıń kubogi ushın «InnovAItion Hack-2025» tańlawı shólkemlestirildi.

Bilimlendiriw, ádillik hám sud sisteması, suw xojalıǵı, isbilermenlikti rawajlandırıw, turizm baǵdarları boyınsha ótkerilgen tańlawǵa Ájiniyaz atındaǵı Nókis mámleketlik pedagogikalıq institutınıń innovator student-jasları óz joybarları menen belsene qatnastı.

Quwanıshlısı, tańlawda institutımızdıń Tábiyiy pánler fakulteti biologiya tálim baǵdarınıń 3-kurs student Kúmisay Qızılbaeva basshılıǵındaǵı «Vision X» toparı «Eń jaqsı platforma» baǵdarında sıylı 1-orındı iyeledi hám 45 000 000 sum muǵdarında sıylıqlandı.

Institut rektorı Alisher Ubbiyev jıl juwmaǵına arnalǵan saltanatlı bayram keshesinde jeńimpaz studentimiz Kúmisay Qızılbaevanı qutlıqlap, aldaǵı oqıwı hám ilimiy-innovaciyalıq jumıslarında tabıslar tiledi.

NMPI baspasóz xızmeti.