Assalawma áleykum, húrmetli professor-oqıtıwshılar, pidayı xızmetkerler, qádirli student-jaslar!

Eń dáslep, bársheńizdi kirip kiyatırǵan Jańa jıl bayramı menen shın júrekten qutlıqlayman. Jańa jıl – bul iygilikli tilekler, jańa maqsetler hám úlken úmitler menen kútip alınatuǵın, juwmaqlanıp atırǵan jılǵa qalıs baha berip, keleshekke isenimli qádem taslanatuǵın payızlı bayram bolıp esaplanadı.

Ótip baratırǵan 2025-jıl institutımız turmısında nátiyjeli miynet, izleniw hám áhmiyetli tabıslar jılı boldı. Oqıw procesin jetilistiriw, ilimiy-izertlew jumısların rawajlandırıw, jaslar menen islesiw, ruwxıy-aǵartıwshılıq baǵdarındaǵı ilajlardı sistemalı shólkemlestiriw boyınsha salmaqlı jumıslar ámelge asırıldı. Bul jetiskenlikler, álbette, siz – pidayı pedagoglar, juwapker xızmetkerler hám umtılıwshań studentlerimizdiń birgeliktegi miynetiniń nátiyjesi bolıp tabıladı.

Búgin biz keleshegimiz bolǵan jaslarımızdıń bilimli, básekige shıdamlı, ana Watanımızǵa sadıq hám joqarı juwapkershilikli kadrlar bolıp kamalǵa keliwi ushın xızmet etip atırmız. Bul bolsa hár birimizden ele de úlken juwapkershilik, jańasha qatnas hám tınımsız izleniwdi talap etedi. Men isenemen, jańa jılda da jámáátimiz benen birgelikte aldımızǵa qoyılǵan barlıq wazıypalardı múnásip túrde orınlaymız.

Jańa jıl hár birińizdiń shańaraǵıńızǵa tatıwlıq, bekkem densawlıq, mol ırısqı-nesiybe alıp kelsin. Jańa jıl bársheńiz ushın quwanıshlı waqıyalar, jańa tabıslar hám ámelge asqan arzıwlar jılı bolsın.

Jańa jılıńız qutlı bolsın!

Húrmet penen,

Alisher Ubbiyev,
Ájiniyaz atındaǵı Nókis mámleketlik pedagogikalıq institutı rektorı.