Ózbekstan Respublikası Mektepke shekemgi hám mektep bilimlendiriwi ministrligi tárepinen qızlardıń málimleme texnologiyaları boyınsha bilimlerin ele de arttırıw, olardı zamanagóy kásiplerge baǵdarlaw, aldınǵı ideyaların qollap-quwatlaw maqsetinde 2021-jıldan berli «Digital Generation Girls» («Sanlı áwlad qızları») tańlawı turaqlı túrde ótkerilip kelinbekte.

Usı jıldıń 6-7-yanvar kúnleri paytaxtımız Nókis qalasında tańlawdıń Qaraqalpaqstan Respublikası basqıshı bolıp ótti.

Tańlawda 21-30 jas kategoriyası boyınsha Ájiniyaz atındaǵı Nókis mámleketlik pedagogikalıq institutı Anıq pánler fakulteti matematika hám informatika keshki tálim baǵdarınıń studenti Zilola Allakova qantlı diabet hám tuberkulyozdıń jasarıwınıń erte aldın alıwǵa baǵdarlanǵan startap joybarı menen qatnasıp, sıylı 2-orındı iyeledi hám respublikalıq basqıshqa jollamanı qolǵa kirgizdi.

Jasıl ekonomika, jasalma intellekt, klimat ózgeriwi hám bilimlendiriw sıyaqlı baǵdarlarda ótkeriletuǵın «Sanlı áwlad qızları» tańlawınıń respublikalıq basqıshında jeńimpaz bolǵan qatnasıwshılar sırt elge bilimlendiriw saparına jollamanı qolǵa kirgizedi. Sonday-aq, eń jaqsı 10 joybar ámeliyatqa engiziw ushın usınıs etiledi.

Institutımız studenti Zilola Allakovaǵa respublikalıq basqıshta joqarı nátiyjelerge erisiwine tileklespiz.

NMPI baspasóz xızmeti.