Ájiniyaz atındaǵı Nókis mámleketlik pedagogikalıq institutında tyutorlar tárepinen 2025-jılda ámelge asırılǵan jumıslardıń juwmaqları hám 2026-jıl ushın belgilengen wazıypalardı belgilep alıwǵa arnalǵan prezentaciyalar ótkerilmekte.

Búgin, 9-yanvar kúni dáslep Filologiya fakulteti tyutorlarınıń prezentaciyası shólkemlestirildi. Ilajǵa instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov, rektor másláhátshisi Ǵulamjan Ibadullaev, tiyisli juwapkerler hám dekan orınbasarları qatnastı.

Prezentaciya dawamında tyutorlar tárepinen 2025-jıl dawamında studentlerdiń oqıwǵa qızıǵıwshılıǵın arttırıw, ruwxıy-aǵartıwshılıq tárbiya processlerin jetilistiriw, sociallıq-psixologiyalıq qollap-quwatlaw jumısları, jataqxana, ijara úylerinen xabar alıw, sabaqtan bos waqıtların mazmunlı shólkemlestiriw, jaslardıń qábiletlerin júzege shıǵarıw hám mashqalalarına sheshim tabıw sıyaqlı baǵdarlarda erisilgen nátiyjeler analizlendi.

Ilajda tyutorlardıń pikir-usınısları tiykarında 2026-jıl ushın áhmiyetli baǵdarlar hám rejeler de belgilep alındı. Atap aytqanda, studentlerdiń bilimin jetilistiriw, tárbiyalıq jumıslardı sistemalı shólkemlestiriw, sanlı monitoring mexanizmlerin engiziw, ata-ana – tyutor – student birge islesiwin kúsheytiw, jaslardı salamat turmıs tárizine keńnen tartıw hám olardıń huqıqıy mádeniyatın arttırıwǵa baǵdarlanǵan jańa baslamalar dodalandı.

Prezentaciya ilajları fakultetler kesiminde dawam etpekte.

NMPI baspasóz xızmeti.