Ájiniyaz atındaǵı Nókis mámleketlik pedagogikalıq institutı hayal-qızlar másláhát keńesi hám Arqa-batıs áskeriy okrugi tárepinen 14-yanvar – Watan qorǵawshıları kúni múnásibeti menen «Jańa Ózbekstannıń watansúyiwshi hayal-qızları» atamasında ushırasıw keshesi hám bayram ilajı shólkemlestirildi.

Ilajǵa Arqa-batıs áskeriy okrugi hayal-qızlar hám áskeriy xızmetkerlerdiń shańaraq aǵzaları menen islesiw boyınsha jetekshi qánigesi Gúlbáhár Habibullaeva, úshinshi dárejeli serjant Gúlxan Máwlenova, kishi serjant Nargiza Turaeva, fakultet dekanlarınıń hayal-qızlar másláhátshileri hám studentler qatnastı.

Ushırasıwda institut rektorınıń hayal-qızlar máseleleri boyınsha másláhátshisi Sayyora Bekchanova hám miymanlar sózge shıǵıp, jámiyetlik turmıstıń hár qıylı tarawlarında, sonıń ishinde, áskeriy tarawda elimizdiń rawajlanıwı hám tınıshlıǵın támiyinlew jolında pidayılıq penen miynet etip atırǵan hayal-qızlardıń ornı haqqında sóz etti.

Ilaj dawamında qatnasıwshılar watansúyiwshilik, ana Watanǵa sadıqlıq, shańaraqta hám jámiyette hayal-qızlardıń juwapkershiligi hám Jańa Ózbekstandı qurıwdaǵı belsene qatnası haqqında pikirlerin bildirdi.

Ushırasıw Arqa-batıs áskeriy okruginiń áskeriy orkestri hám instituttıń qábiletli studentleri atqarıwındaǵı koncert baǵdarlaması menen dawam etti.

NMPI baspasóz xızmeti.