Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti Administraciyası janındaǵı Bilimlendiriw sapasın támiyinlew milliy agentliginiń juwapkerleri tárepinen professor-oqıtıwshılar hám studentlerdiń bilimlendiriw sapası boyınsha pikirlerin úyreniwge baǵdarlanǵan ulıwma milliy sorawnama ótkerildi.

Prezidentimizdiń 2025-jıl 5-maydaǵı «Bilimlendiriw sapasın támiyinlew hám bilimlendiriw xızmetlerin kórsetiw sistemasın jetilistiriw boyınsha qosımsha ilajlar haqqında»ǵı pármanı tiykarında shólkemlestirilgen bul sorawnama bilimlendiriw sapasın arttırıw, oqıw procesiniń nátiyjeliligin bahalaw, professor-oqıtıwshılardıń kásiplik jumısları hám studentler ushın jaratılǵan sharayatlar boyınsha pikir-usınısların úyreniwge qaratılǵan.

Milliy agentlik wákilleri tárepinen sorawnamanıń maqseti, áhmiyeti hám nátiyjeleri tiykarında bilimlendiriw sistemasın jetilistiriw baǵdarında ámelge asırılatuǵın ilajlar haqqında tolıq maǵlıwmatlar berildi. Bildirilgen pikir hám usınıslar ulıwmalastırılıp, bilimlendiriw sapasın ele de jetilistiriwge baǵdarlanǵan qararlardı qabıllawda áhmiyetli dárek bolıp xızmet etetuǵınlıǵı atap ótildi.

Ilaj sheńberinde qatnasıwshılar óz pikirlerin bildiriw, orın alıp atırǵan mashqalalar hám olardıń sheshimleri boyınsha usınıslar beriw imkaniyatına iye boldı.

NMPI baspasóz xızmeti.