Ájiniyaz atındaǵı Nókis mámleketlik pedagogikalıq institutında Demokratiyalıq processlerdi analizlew orayı Qaraqalpaqstan Respublikası aymaqlıq bólimi menen birgelikte «Ózbekstan Respublikası Prezidentiniń Múrájatı: Mámleketlik rawajlanıwdıń ilimiy hám ámeliy tiykarlarınıń jaratılıwı hám baǵdarları» atamasındaǵı seminar jáne dógerek sáwbeti shólkemlestirildi.

Ilajǵa institut professor-oqıtıwshıları, izleniwshiler, tyutorlar hám student-jaslar qatnastı.

Seminardı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı, pedagogika ilimleriniń doktorı, professor Quvondiq Qodirov basqarıp bardı.

Ol óz shıǵıp sóylewinde Prezident Múrajatında belgilep berilgen tiykarǵı wazıypalar, atap aytqanda, mámleketlik hám jámiyetlik basqarıwdı jetilistiriw, ilim hám bilimlendiriwdi rawajlandırıw, sanlı ekonomika, sociallıq taraw hám puqaralıq jámiyeti institutların bekkemlew, sonıń menen birge, jaslar ushın jaratılǵan imkaniyatlar hám mashqalalardıń sistemalı sheshiliwi sıyaqlı máseleler boyınsha áhmiyetli usınısların bildirdi.

Seminar dawamında Demokratiyalıq processlerdi analizlew orayı Qaraqalpaqstan Respublikası aymaqlıq bóliminiń baslıǵı, tariyx ilimleriniń doktorı, professor Yaxshibeka Abdullaeva, aymaqlıq bólimniń bas qánigesi Jasur Urazımbetov Múrájatta alǵa qoyılǵan ideyalar hám baslamalardıń ilimiy-ámeliy áhmiyeti, olardı aymaqlar hám tarawlar kesiminde ámelge asırıw mexanizmleri boyınsha bayanat jasadı.

Dógerek sáwbeti formatında ótkerilgen ilajda Ózbekstan Respublikasına miyneti sińgen jaslar ustazı Begdulla Sultanov, Nókis qalalıq hákimligi «Paytaxt» gazetasınıń bas redaktorı Ǵayratdin Berdibaev, Ózbekstan mámleketlik emes kommerciyalıq emes shólkemleri milliy associaciyası Qaraqalpaqstan Respublikası aymaqlıq bóliminiń baslıǵı Quwatbay Karimxojaevlar sózge shıǵıp, Prezident Múrájatında belgilengen wazıypalardı ilimiy tiykarda úyreniw hám olardı ámeliyatqa engiziwde joqarı oqıw orınları jáne analitikalıq oraylar arasındaǵı birge islesiwdi ele de kúsheytiwdiń áhmiyetin atap ótti.

Seminar óz ara pikir almasıw hám soraw-juwaplar menen dawam etti.

NMPI baspasóz xızmeti.