Ájiniyaz atındaǵı Nókis mámleketlik pedagogikalıq institutı Anıq pánler fakultetinde studentler arasında náshebentlik hám narkojınayatlardıń aldın alıwǵa baǵdarlanǵan profilaktikalıq ushırasıw bolıp ótti.

Ushırasıwǵa Respublikalıq qánigelestirilgen narkologiya ilimiy-ámeliy orayınıń shıpakeri D.Qurbanova, instituttıń profilaktikalıq inspektorı M.Narımbetova, tyutorlar hám studentler qatnastı.

Ilajda fakultet dekanınıń orınbasarı X.Esemuratov sózge shıǵıp, jaslardı zıyanlı ádetlerden saqlaw, olardıń bos waqtın mazmunlı shólkemlestiriw, salamat turmıs tárizin úgit-násiyatlaw máseleleri áhmiyeti haqqında aytıp ótti.

Ushırasıw dawamında qánigeler tárepinen náshebentliktiń jámiyet hám jaslar turmısına unamsız tásiri, onıń densawlıq, ruwxıy dúnyaǵa hám keleshektegi ómirine keltiretuǵın zıyanı haqqında tolıq maǵlıwmatlar berildi. Sonday-aq, náshebentlik zatlar menen baylanıslı huqıqbuzarlıq hám jınayatlar ushın belgilengen nızamlı juwapkershilik sharaları boyınsha túsinikler berildi.

Ushırasıw sońında náshebentlik hám narkojınayatlarǵa qarsı gúresiw hámmemizdiń ulıwmalıq wazıypamız ekenligi, jaslar arasında huqıqıy sana hám juwapkershilikti arttırıw boyınsha usınday profilaktikalıq ilajlar turaqlı ótkeriliwi atap ótildi.

NMPI baspasóz xızmeti.