Ájiniyaz atındaǵı Nókis mámleketlik pedagogikalıq institutında «Keleshekke qádem» baǵdarlaması sheńberinde pitkeriwshi kurs studentleriniń bántligin támiyinlew, olardıń isbilermenlik kónlikpelerin rawajlandırıw hám biznes ideyaların ámeliyatqa engiziw maqsetinde seminar-trening shólkemlestirildi.

Seminarǵa «AYLIN», «KAYPANOV DEVELOPMENT», «MULTI BREND PRO», «OSMO LIGHTING» kompaniyalarınıń tiykarshısı, belgili isbilermen Azamat Qaypanov, «Ózmilliybank» akcionerlik jámiyetiniń Qaraqalpaqstan Respublikası boyınsha filialı qánigesi Klara Sharipova, Jaslar isleri agentligi janındaǵı «Jaslar – keleshegimiz» qorınıń jas isbilermenler menen islesiwshi bas qánigesi Azada Mańǵıtbaeva, sonday-aq, tiyisli juwapkerler, instituttıń pitkeriwshi kurs studentleri qatnastı.

Ilaj dawamında jaslardı isbilermenlik jumıslarına tartıw, startap hám biznes joybarlardı qarjılandırıw mexanizmleri, jeńillikli kreditler, grantlar hám ámeliy qollap-quwatlaw máseleleri boyınsha tolıq maǵlıwmatlar berildi.

Sonday-aq, studentler tárepinen alǵa qoyılǵan biznes ideyalar qánigeler tárepinen dodalanıp, olardı turmısqa engiziw boyınsha ámeliy usınıslar bildirildi. Seminar-trening soraw-juwaplar menen dawam etti.

Ilaj pitkeriwshi kurs studentleri ushın keleshekte óz bizneslerin baslaw, isbilermenlik penen shuǵıllanıw arqalı bántligin támiyinlew hám óz dáramatına iye bolıw kónlikpelerin payda etiwde úlken áhmiyetke iye boldı.

NMPI baspasóz xızmeti.