Buxara qalasında matematika boyınsha «Bukhara International Mathematics Olympiad (BIMO-2026)» xalıqaralıq pán olimpiadası bolıp ótti. Buxara mámleketlik universitetinde shólkemlestirilgen usı xalıqaralıq ilajǵa Rossiya, Túrkmenstan, Iordaniya, Pakistan, Ázerbayjan, Hindstan, Qıtay, Tájikstan sıyaqlı 10 nan aslam mámleketlerden, sonday-aq, respublikamızdaǵı 50 den aslam jetekshi joqarı oqıw orınlarınan wákiller qatnastı.

Xalıqaralıq pán olimpiadasına Ájiniyaz atındaǵı Nókis mámleketlik pedagogikalıq institutı Anıq pánler fakulteti matematika kafedrasınıń aǵa oqıtıwshısı, fizika-matematika ilimleriniń kandidatı Azamat Xojaniyazov hám usı kafedranıń assistent-oqıtıwshısı, fizika-matematika ilimleriniń kandidatı Aydos Qutbaev basshılıǵındaǵı komanda aǵzaları qatnasıp, joqarı nátiyjelerge eristi.

Atap aytqanda, 4-kurs studentleri Baxram Allakuatov hám Ismetulla Nawrızbaev, sonday-aq, 3-kurs studenti Javohir Avezov sıylı 3-orındı iyelep, xalıqaralıq pán olimpiadasınıń qola medalın qolǵa kirgizgen bolsa, 2-kurs studenti Sayıpbek Nuratdinov belsene qatnasqanlıǵı ushın sertifikat penen sıylıqlandı.

Eń áhmiyetlisi, komandalıq tur boyınsha institutımız komandası joqarı kórsetkishlerge erisip, ekinshi dárejeli diplom hám kubok penen sıylıqlandı.

Institut jámááti atınan matematika boyınsha xalıqaralıq pán olimpiadasında joqarı nátiyjelerge erisken komandamız aǵzaların shın júrekten qutlıqlaymız!

NMPI baspasóz xızmeti.