Ilimniń rawajlanıwına múnásip úles qosıp atırǵan, óz bilimi hám potencialı menen jámiyettiń rawajlanıwına xızmet etip atırǵan barlıq ilimpaz, izleniwshi, ustaz hám pedagog hayal-qızlardı búgingi bayram menen qutlıqlaymız.

Búgingi kúnde Ájiniyaz atındaǵı Nókis mámleketlik pedagogikalıq institutında ulıwma 556 professor-oqıtıwshı jumıs alıp barıp atırǵan bolsa, sonnan 295 i hayal-qızlar bolıp esaplanadı. Olardan 13 ilim doktorı (DSc), 114 ilim kandidatı hám filosofiya doktorı (PhD) ilimiy dárejelerine, sonıń ishinde, 13 professor, 74 docent ilimiy ataqlarına iye bolǵan hayal-qızlar joqarı qánigeli pedagog kadrlar tayarlawǵa óz úleslerin qospaqta.

Sonday-aq, institutta hayal-qızlar basqarıw tarawında da belsendilik kórsetip kiyatırǵan bolıp, olar prorektor, fakultet dekanları hám kafedra baslıqları sıyaqlı juwapkershilikli lawazımlardı pidayılıq penen atqarıp kelmekte.

Sizlerdiń pidayılıǵıńız, umtılıslarıńız hám ilimge bolǵan sadıqlıǵıńız jas áwlad ushın úlgi, keleshek ushın bekkem tiykar bolıp tabıladı. Ilim jolındaǵı izleniwlerińiz dawamlı, tabıslarıńız mol bolǵay!

NMPI baspasóz xızmeti.