Belgili mámleketlik hám jámiyetlik ǵayratker, miynet veteranı, húrmetli el aǵası Qállibek Kamalov usı jıldıń 11-fevral kúni 100 jasında dúnyadan ótti.

Qállibek Kamalov 1926-jılı 18-martta Qaraqalpaqstan Respublikasınıń Taxtakópir rayonında dúnyaǵa kelgen. Orta mektepti pitkerip, áskeriy xızmetke atlanǵan bolsa, keyin ala 1953-1955-jılları Qaraqalpaq mámleketlik pedagogikalıq institutı (házirgi Ájiniyaz atındaǵı Nókis mámleketlik pedagogikalıq institutı)nıń tariyx qánigeligin joqarı bahalar menen tabıslı tamamlaǵan.

Óz ómirin tuwılıp ósken eldiń rawajlanıwı ushın baǵıshlaǵan Qállibek Kamalov sheber basshı sıpatında 1959-1963-jıllarda Qaraqalpaqstan Respublikası Ministrler Keńesiniń Baslıǵı, 1963-1984-jıllarda Qaraqalpaqstan Respublikası partiya komitetiniń Birinshi xatkeri – respublika basshısı sıyaqlı juwapkershilikli wazıypalarda aymaqtı hár tárepleme rawajlandırıw, tarawlarda jumıslardı zamanagóy talaplar tiykarında jolǵa qoyıw boyınsha pidayılıq menen xızmet etti.

Onıń mámleketimiz hám xalqımız aldındaǵı úlken xızmetleri múnásip bahalanıp, «Shuhrat» medalı hám «El-yurt hurmati» ordeni menen sıylıqlanǵan.

El aǵası Qállibek Kamalov institutımızdıń 90 jıllıǵına arnalǵan maqalasında:

«Nókis mámleketlik pedagogikalıq institutı elimizde tuńǵısh joqarı bilim orayı. Bul institut qaraqalpaq eliniń jańalanıwına, mádeniy rawajlanıwına, xalqımızdıń ilimiy dárejesiniń ósiwine kadrlar tayarlap, teńi-tayı joq úlken úles qostı.

Sonlıqtan, bul instituttıń atı Qaraqalpaqstan tariyxında altın sıya menen jazılıwı kerek», – dep keltirip ótken edi.

Belgili mámleketlik hám jámiyetlik ǵayratker, kóplegen shákirtlerdiń mehriban ustazı, húrmetli el aǵası Qállibek Kamalovtıń qaytıs bolıwı múnásibeti menen shańaraq aǵzaları, perzentleri, barlıq jaqınları hám shákirtlerine tereń qayǵırıw menen kewil aytamız.

Onıń el-xalqımız ushın islegen tariyxıy xızmetleri xalqımızdıń hám keleshek áwladlar júreginde máńgige saqlanıp qaladı.

Ájiniyaz atındaǵı Nókis mámleketlik pedagogikalıq institutı rektoratı, miynet jámááti hám jámiyetlik shólkemleri.