Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ishki isler ministrligi janındaǵı Qorǵaw xızmeti xızmetkerleri tárepinen profilaktikalıq úgit-násiyat ilajı shólkemlestirildi. Ilaj dawamında máhállelerde jınayatshılıq hám huqıqbuzarlıqlardıń aldın alıw, jámiyetlik tártipti saqlaw hám puqaralardıń múlkin isenimli qorǵaw máselelerine ayrıqsha itibar qaratıldı.

Taraw qánigeleri tárepinen qorǵaw xızmetiniń tiykarǵı wazıypaları, zamanagóy texnikalıq qorǵaw quralları, signalizaciya sistemaları hám operativ háreketleniw toparlarınıń jumısı haqqında tolıq maǵlıwmat berildi. Sonday-aq, puqaralar hám shólkemler ushın qorǵaw xızmetinen paydalanıwdıń abzallıqları, qáwipsizlikti támiyinlewde profilaktikanıń ornı keńnen túsindirildi.

Ilaj dawamında student-jaslar ózlerin qızıqtırǵan sorawlarǵa qánigelerden hár tárepleme juwaplar aldı. Bunday ushırasıwlar jaslar arasında huqıqıy mádeniyattı arttırıw, jınayatshılıqqa qarsı gúresiwde birge islesiwdi kúsheytiw hám qáwipsiz ortalıqtı qáliplestiriwde úlken áhmiyetke iye.

NMPI baspasóz xızmeti.