Ájiniyaz atındaǵı Nókis mámleketlik pedagogikalıq institutında «Jaslar arasında náshebentlik hám psixotrop zatlardıń tarqalıwınıń aldın alıw» kompleksli operativlik-profilaktikalıq ilajları sheńberinde úgit-násiyat ushırasıwı bolıp ótti.

Ózbekstan Respublikası Prezidentiniń «Xalıqtıń salamatlıǵı hám millet genofondın náshebentlik hám narkojınayatlardan nátiyjeli qorǵaw boyınsha kompleksli ilajlar haqqında»ǵı pármanı tiykarında shólkemlestirilgen ilajǵa Ishki isler ministrliginiń tiyisli qánigeleri, fakultet dekanlarınıń orınbasarları, professor-oqıtıwshılar, tyutorlar hám studentler qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov alıp bardı.

Ushırasıwda Ózbekstan Respublikası Ishki isler ministrligi Operativ izlew departamenti jınayat-izlew basqarmasınıń aǵa operativ wákili, podpolkovnik R.Jumatov, Qaraqalpaqstan Respublikası Ishki isler ministrligi Operativ izlew xızmeti jınayat-izlew basqarması baslıǵınıń orınbasarı, podpolkovnik M.Yarlakabov, usı basqarmanıń aǵa operativ wákili A.Aljanov, Respublikalıq narkologiyalıq dispanseriniń narkolog shıpakeri R.Atanazarov, Qaraqalpaqstan Respublikası Bajıxana basqarmasınıń xızmetkeri A.Berdibekov sózge shıqtı.

Ilajda taraw qánigeleri jaslar arasında náshebentliktiń unamsız aqıbetleri, psixotrop zatlardan paydalanıwdıń insan salamatlıǵı hám jámiyetlik qáwipsizlikke keltiretuǵın zıyanlı aqıbetleri haqqında tolıq maǵlıwmatlar berdi.

Ushırasıw soraw-juwaplar menen dawam etti.

NMPI baspasóz xızmeti.