Ózbekstan Kórkem óner akademiyası Qaraqalpaqstan bóliminiń Kórgizbe sarayında «Qaraqalpaqstan: keshe hám búgin» atamasındaǵı fotokórgizbeniń ashılıwı hám fototańlaw jeńimpazların sıylıqlaw máresimi bolıp ótti.

Qaraqalpaqstan Respublikası Mádeniyat ministrligi, Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi, Ózbekstan Kórkem óner akademiyası Qaraqalpaqstan bólimi menen birgelikte shólkemlestirilgen tańlawǵa 10 nan aslam fotograflar ózleriniń dóretiwshilik jumısları menen qatnastı.

Tańlaw nátiyjelerine bola, eń jaqsı dep tabılǵan 5 avtordıń 80 nen aslam fotosúwretleri kórgizbeden orın aldı.

Quwanıshlısı, olar arasında Ájiniyaz atındaǵı Nókis mámleketlik pedagogikalıq institutı baspasóz xatkeri Islam Matekovtıń avtorlıǵındaǵı institut turmısına arnalǵan fotosúwretler joqarı bahalanıp, 2-orınǵa ılayıq kórildi hám shólkemlestiriwshiler tárepinen diplom jáne sawǵalar menen sıylıqlandı.

Tańlawdıń maqseti elimizde ámelge asırılıp atırǵan keń kólemli reformalar, infrastrukturalıq ózgerisler hám jaslar belsendiligin keń jámiyetshilikke jetkeriw hám dóretiwshilerdi qollap-quwatlaw bolıp tabıladı.

NMPI baspasóz xızmeti.