Ájiniyaz atındaǵı Nókis mámleketlik pedagogikalıq institutı «Lider qızlar» klubı hám Jaslar awqamı baslanǵısh shólkemi tárepinen student-qızlar ushın ilimiy jumıslardı rawajlandırıwǵa baǵdarlanǵan seminar-trening ótkerildi.

Seminarǵa ilimiy maqala jazıwǵa qızıǵatuǵın, mámleketlik stipendiyalar tańlawında qatnasıwdı qáleytuǵın bakalavriattıń 1-2-3-kurslarında oqıp atırǵan student-qızlar qatnastı.

– Eki kún dawam etetuǵın biypul treningimiz dawamında qatnasıwshılar ilimiy maqala jazıwdıń tiykarǵı basqıshları, hújjetlerdi durıs tayarlaw tártibi hám ilimiy jumıslardı nátiyjeli jolǵa qoyıw boyınsha áhmiyetli bilimlerge iye boladı, – deydi Tólepbergen Qayıpbergenov atındaǵı mámleketlik stipendiya tańlawınıń jeńimpazı, «Lider qızlar» klubınıń ilimiy jumıslar boyınsha jetekshisi, institutımız magistrantı Ulzada Umirbaeva.

Seminar-treningde shınıǵıwlar ámeliy baǵdarda shólkemlestirilip, turmıslıq mısallar, interaktiv tapsırmalar hám jeke másláhátler arqalı studentler óz bilim hám kónlikpelerin bekkemlew imkaniyatına iye boldı.

NMPI baspasóz xızmeti.