Ájiniyaz atındaǵı Nókis mámleketlik pedagogikalıq institutı Filologiya fakulteti qaraqalpaq tili kafedrasınıń shólkemlestiriwinde  «Qaraqalpaq til biliminiń aktual máseleleri: teoriya, ámeliyat, metodika» atamasındaǵı II respublikalıq ilimiy-teoriyalıq konferenciya bolıp ótti.

Konferenciyada Ózbekstan Ilimler akademiyası Qaraqalpaqstan bólimi Qaraqalpaq gumanitar ilimler ilimiy-izertlew institutınıń úlken ilimiy xızmetkeri, filologiya ilimleriniń kandidatı Q.Bekbergenov, Qaraqalpaqstan Respublikası Ministrler Keńesi Baslıǵınıń másláhátshisi – departament baslıǵı, filologiya ilimleriniń doktorı (DSc) P.Dabılov, «Erkin Qaraqalpaqstan» gazetasınıń arnawlı xabarshısı, jurnalist G.Júginisova, instituttıń mektepke shekemgi tálim kafedrası professorı, pedagogika ilimleriniń doktorı (DSc) G.Jumasheva bayanat isledi.

Sonday-aq, konferenciyaǵa Ózbekstan Ilimler akademiyası Qaraqalpaqstan bólimi Qaraqalpaq gumanitar ilimler ilimiy-izertlew institutı professorı P.Najimov, Nókis qalası hákiminiń ruwxıylıq hám mámleketlik til máseleleri boyınsha másláhátshisi B.Abdireymov, institut professorları Q.Qoshanov, G.Qurbaniyazov, basqa da joqarı oqıw orınlarınan ilimpazlar, bilimlendiriw mákemelerinen muǵallimler, institut professor-oqıtıwshıları, doktorant hám magistrantlar, jas izleniwshiler hám studentler, keń jámiyetshilik hám ǵalaba xabar quralları wákilleri qatnastı.

Konferenciya baǵdarlaması boyınsha úsh sekciya jumısı dawam etip, onda qaraqalpaq til bilimin izertlewdegi aktual máseleler, til bilimi hám ádebiyattanıwdı izertlewdegi jańa baǵdarlar, qaraqalpaq tili hám ádebiyatın oqıtıwǵa zamanagóy qatnas boyınsha, sonday-aq, qaraqalpaq tili menen basqa tillerdi salıstırmalı izertlewge baylanıslı ilimiy bayanatlar orın aldı.

Ótkerilgen konferenciya túrkiy tiller sistemasında qaraqalpaq tiliniń mámleketlik til sıpatındaǵı ornı, búgingi kúnde ushırasıp atırǵan mashqalalar, olardı sheshiw ushın aldaǵı wazıypalar, qaraqalpaq tili rawajlanıwınıń huqıqıy tiykarları, internet tarmaqlarında qaraqalpaq tilin rawajlandırıw máseleleri boyınsha pikir almasıwlar menen dawam etti.

NMPI baspasóz xızmeti.