Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakultetinde ziyrek studentlerdiń ilimiy-izertlew jumısların shólkemlestiriw bólimi tárepinen «Jaslardıń zamanagóy bilimlendiriw sistemasına kózqarası: jasalma intellekttiń abzallıqları hám kemshilikleri» atamasındaǵı xalıqaralıq ilimiy-metodikalıq seminar shólkemlestirildi.

Baslawısh tálim kafedrası baslıǵı Z.Qurbaniyazova basshılıǵında ótkerilgen seminarǵa onlayn formatta Qazaqstan Respublikası Abay atındaǵı Qazaq milliy pedagogikalıq universiteti baslawısh tálim kafedrasınıń docenti, pedagogika ilimleriniń kandidatı A.Kariev, Rossiya Federaciyası Kuban mámleketlik universitetiniń student-jasları, sonday-aq, institut studentleri qatnastı.

Seminar zamanagóy bilimlendiriw procesinde sanlı texnologiyalar, sonıń ishinde, jasalma intellekt imkaniyatlarınan nátiyjeli paydalanıw, onıń bilimlendiriw sapası hám nátiyjeliligine tásiri máselelerin dodalawǵa arnaldı.

Ilajda jasalma intellekt tiykarında isleytuǵın bilimlendiriw platformaları, avtomatlastırılǵan bahalaw sistemaları, jaslardıń zamanagóy bilimlendiriwge bolǵan kózqarasları, sanlı sawatlılıq dárejesi hám innovaciyalıq texnologiyalar boyınsha pikir almasıldı.

Seminar juwmaǵında belsene qatnasqan studentlerge sertifikatlar tapsırıldı.