Ájiniyaz atındaǵı Nókis mámleketlik pedagogikalıq institutı 1-sanlı studentler turaq jayında 25-fevral – Júweri gúrtik kúni múnásibeti menen qaraqalpaq xalqınıń milliy taǵamı – júweri gúrtik tayarlaw boyınsha tańlaw shólkemlestirildi.

– Hár jılı studentler turaq jayında usı bayramdı belgilep, studentler menen birgelikte júweri gúrtik tayarlap, ata-babalarımızdan miyras bolıp kiyatırǵan úrp-ádetler, dástúrler hám qádiriyatlar haqqında sáwbetlesemiz, óz ara pikir almasıp, tariyxımız jáne mádeniyatımız haqqında maǵlıwmatlar beremiz. Bul bayram wálayatlardan kelgen studentler arasında da oǵada qızıǵıwshılıq payda etedi. Olar qaraqalpaq xalqınıń milliy taǵamı júweri gúrtik hám onıń tayarlanıwı haqqında maǵlıwmatlarǵa iye boladı. Álbette, bul bayram arqalı biz elimizdiń ózine tán mádeniyatı, tariyxı, salt-dástúrleri hám milliy taǵamımızdı dúnya júzine tanıtıwǵa úles qosamız, – deydi pedagog-tárbiyashı Muhabbat Ábdimuratova biz benen sáwbette.

Ilajǵa instituttıń tiyisli juwapkerleri qatnasıp, jaslarımız arasında usınday milliyligimizdi úgit-násiyatlawǵa úles qosıp atırǵan studentler turaq jayı jámáátine hám pedagog-tárbiyashılarına minnetdarshılıq bildirdi.

Tańlaw sheńberinde student-jaslar birgelikte milliy taǵam – júweri gúrtikti tayarlap, bayram dasturqanına tarttı. Qatnasıwshılar shólkemlestiriwshiler tárepinen xoshametlendi.

Maǵlıwmat ornında atap ótiw kerek, 2023-jıldan baslap Qaraqalpaqstan Respublikasında 25-fevral jámiyetlik baslama tiykarında «Júweri gúrtik kúni» sıpatında xalqımız arasında keń túrde belgilenip kelinbekte.

Álbette, bunday baslamalar ata-babalarımızdan miyras bolıp kiyatırǵan dástúrlerdi keleshek áwladlarǵa jetkeriw, milletler arasında doslıq hám óz ara húrmetti bekkemlewde ayrıqsha áhmiyetke iye bolmaqta.

NMPI baspasóz xızmeti.