Ájiniyaz atındaǵı Nókis mámleketlik pedagogikalıq institutınıń barlıq fakultetlerinde «Piyshembi – jaslar kúni» múnásibeti menen ushırasıwlar, mádeniy-aǵartıwshılıq ilajları, bayram kesheleri shólkemlestirildi.

Filologiya fakulteti tárepinen 3-sanlı studentler turaq jayında «Zulfiya áwladlarımız» atamasındaǵı ushırasıw shólkemlestirildi. Onda Zulfiya atındaǵı mámleketlik sıylıqtıń laureatı, filologiya ilimleri boyınsha filosofiya doktorı Aysholpan Orazımbetova miyman bolıp qatnastı.

Ellikqala fakultetinde student-jaslar arasında huqıqbuzarlıqlardıń aldın alıwǵa arnalǵan úgit-násiyat ushırasıwı bolıp ótti. Ilajǵa fakultet dekanatı, professor-oqıtıwshılar, huqıq qorǵaw uyımlarınıń wákilleri hám student-jaslar qatnastı.

Tariyx fakulteti jámááti hám student-jasları tárepinen paytaxtımızdaǵı «Shımbay shayxana» máhállesinde «Nuranıy hám jaslar» ushırasıwı shólkemlestirildi. Oǵan kóp jıllıq ómir tájiriybesine iye nuranıylar hám student-jaslar qatnastı.

Mektepke shekemgi hám baslawısh tálim fakultetinde «Ǵárezsiz el jasları» atamasındaǵı ushırasıw bolıp ótti. Ushırasıwǵa respublikalıq hám xalıqaralıq jarıslarda joqarı nátiyjelerge erisken jaslar hám studentler qatnastı.